முன்னாள் எம்எல்ஏ ரங்கநாதன் கைது

சென்னை வில்லிவாக்கம் சட்டமன்ற தொகுதியின் திமுக முன்னாள் எம்எல்ஏ ரங்கநாதன் 02.08.2011 அன்று அதிகாலையில் கைது செய்யப்பட்டார். வீட்டில் இருந்தவரை அதிகாலையில் கைது செய்தது சென்னை காவல்துறை.

நிலமோசடி புகாரில் சென்னை வில்லிவாக்கம் தொகுதி முன்னாள் எம்.எல்.ஏ., ரங்கநாதனை போலீசார் கைது செய்தனர். கைது செய்யப்பட்ட அவரிடம், அரும்பாக்கம்- நொளாம்பூர் காவல் நிலையத்தில் விசாரணை நடத்தப்பட்டது.

இதையடுத்து அவர் நீதிமன்றத்தில் ஆஜர்படுத்தப்பட்டார். 15 நாள் நீதிமன்ற காவலில் வைக்க நீதிபதி உத்தரவிட்டதை தொடர்ந்து ரங்கநாதன், வேலூர் சிறையில் அடைக்கப்பட்டார்.

சென்னை பெரவள்ளூர் ஜவகர் நகரில் உள்ள ரங்கநாதன் வீட்டுக்கு வில்லிவாக்கம் போலீஸ் உதவி கமிஷனர் கண்ணன் தலைமையில் 50க்கும் அதிகமான போலீசார் வந்தனர். தடுத்த காவலாளியை விலக சொல்லிவிட்டு வீட்டுக்குள் அதிரடியாக புகுந்தனர். வீட்டுக்குள் இருந்த முன்னாள் எம்எல்ஏ ரங்கநாதனை வலுக்கட்டாயமாக இழுத்து வந்து போலீஸ் ஜீப்பில் ஏற்றினர். அரும்பாக்கம் காவல் நிலையத்துக்கு அழைத்துச் சென்று விட்டனர். தகவலறிந்த திருவள்ளூர் மாவட்ட திமுக பொறுப்பாளர் மாதவரம் சுதர்சனம் தலைமையில் திமுகவினர் அங்கு விரைந்தனர். அவர்களை போலீசார் தடுத்து நிறுத்தினர். இதனால், போலீசாருக்கும் திமுகவினருக்கும் வாக்குவாதம் ஏற்பட்டது.