நிலம் அபகரிப்பு புகார் : சாணார்பட்டி ஒன்றிய திமுக செயலாளர் விஜயன் கைது

நிலத்தை மிரட்டி எழுதி வாங்கிக் கொண்டதாக சாணார்பட்டி திமுக.ஒன்றியச் செயலாளர் விஜயனை மாவட்டக் குற்றப்பிரிவு போலீசார் 20.08.2011 அன்று கைது செய்தனர்.

திண்டுக்கல் மாவட்டம் வடமதுரை அருகே வி.சித்தூரைச் சேர்ந்தவர் காளியப்பன் மகன் ஈஸ்வரமூர்த்தி(40). இவருக்கு இதே ஊரில் 4ஏக்கர் 40 சென்ட் நிலம் உள்ளது. இதில் 2.40 ஏக்கர்நிலத்தில் வீடு கட்டி குடியிருந்து வருகிறார். மீதம் உள்ள 2ஏக்கரை ஓய்வு பெற்ற எஸ்ஐ. பாலசுப்பிரமணிக்கு விற்று விட்டார். இந்நிலையில் ஈஸ்வரமூர்த்தி மாவட்ட குற்றப்பிரிவில் புகார் அளித்தார். அதில்கூறியதாவது:

கடந்த 20.8.09அன்று சாணார்பட்டி திமுக.ஒன்றியச் செயலாளர் விஜயன் தூண்டுதலின் பேரில் வடமதுரை பேரூராட்சி கவுன்சிலர் அழகுமலை(50), மாவட்ட இளைஞரணி உறுப்பினர் ரஞ்சித்குமார்(40) ஆகியோர் என்னை மிரட்டி எனது நிலத்தையும், வீட்டையும் அவர்கள் பெயருக்கு எழுதி வாங்கிக் கொண்டனர். மேலும் ஓய்வு பெற்ற எஸ்ஐ.யிடமும் நிலத்தை விற்கக் கூறி கொலைமிரட்டல் விடுத்துள்ளனர். இதில் இதே ஊரைச் சேர்ந்த சவுந்திரம், அவரது மனைவி ஈஸ்வரி(30), மதுரை எஸ்எஸ்.காலனி நல்லதம்பி ஆகியோருக்கும் தொடர்பு உள்ளது. இவ்வாறு அதில் தெரிவிக்கப்பட்டுள்ளது.

இதனைத் தொடர்ந்து 6 பேர் மீதும் வழக்குப்பதிவு செய்யப்பட்டது. சாணார்பட்டி திமுக.ஒன்றியச் செயலாளர் விஜயனை இன்ஸ்பெக்டர் முருகன் கைது செய்து திண்டுக்கல் ஜேஎம்.2 கோர்ட்டில் ஆஜர்படுத்தினார்.