சலுகைகளை ரத்து செய்தவர் ஜெயலலிதா

ஏழை மக்களுக்கு திட்டம் தீட்டியவர் முதல்வர் கருணாநிதி என மத்திய இணை அமைச்சர் நெப்போலியன் பேசினார்.

விழுப்புரம் மாவட்டம் சங்கராபுரம் மும்முனை சந்திப்பில் திமுக வேட்பாளர் உதயசூரியனை ஆதரித்து மத்திய இணை அமைச்சர் நெப்போலியன் 30.03.2011 அன்று இரவு பிரசாரம் செய்தார்.

அப்போது அவர் பேசுகையில், “கருணாநிதி ஆட்சியில் சமத்துவபுரம், உழவர் சந்தை, கலைஞர் வீட்டு வசதி திட்டம், மருத்துவ காப்பீட்டு திட்டம், 108 ஆம்புலன்ஸ் சேவை உள்ளிட்ட பல்வேறு நலத் திட்டங்களை ஏழை, எளிய அடித்தட்டு மக்களுக்கு சேருகின்ற வகையில் பல்வேறு திட்டங்களை செயல்படுத்தினார். ஆனால் ஜெயலலிதா ஆட்சியில் இருக்கும் போது திருமண உதவித் தொகையை நிறுத்தினார். அரசு ஊழியர்களுக்கு சலுகைகளையும் ரத்து செய்தார். அதற்கு மாறாக வழக்குகள் பதிவு செய்தார். மக்களுக்கு எந்த சேவையும் செய்யாத ஜெயலலிதா கூட்டணி தோல்வி அடையும். எனவே திமுக கூட்டணி வேட்பாளருக்கு வாக்களிக்க வேண்டும்” என்றார்.