இதற்கிடையில் தொகுதி பங்கீடு குறித்து பேச்சுவார்த்தை நடத்துவதற்காக தி.மு.க. சார்பில் அமைக்கப்பட்டுள்ள ஐவர் குழுவினரும், காங்கிரஸ் சார்பில் அமைக்கப்பட்டுள்ள ஐவர் குழுவினரும் ஏற்கனவே இரு முறை சந்தித்து தொகுதி பங்கீடு பற்றி பேச்சுவார்த்தை நடத்தி உள்ளனர்.
இந்த நிலையில், தொகுதி பங்கீட்டை இறுதி செய்வதற்காக சோனியாகாந்தியின் தூதராக, தமிழக காங்கிரஸ் பொறுப்பாளர் குலாம் நபி ஆசாத் 02.03.2011 அன்று இரவு சென்னை வந்தார். விமான நிலையத்தில் அவரை தி.மு.க. எம்.பி. கனிமொழி, தமிழக காங்கிரஸ் தலைவர் கே.வி.தங்கபாலு, எம்.எல்.ஏ.க்கள் பீட்டர் அல்போன்ஸ், வசந்தகுமார் முன்னாள் மத்திய மந்திரி திருநாவுக்கரசர் ஆகியோர் வரவேற்றனர்.
வரவேற்பு முடிந்ததும் குலாம் நபி ஆசாத் நேராக தி.மு.க.வின் தலைமை அலுவலகமான அண்ணா அறிவாலயத்துக்கு சென்றார். அங்கு அவரை துணை முதல் அமைச்சர் மு.க.ஸ்டாலின், பாராளுமன்ற தி.மு.க. குழுவின் தலைவர் டி.ஆர்.பாலு ஆகியோர் சால்வை அணிவித்து வரவேற்றனர்.
அறிவாலயத்தில் குலாம் நபி ஆசாத், முதல் அமைச்சர் கருணாநிதியை சந்தித்து பேசினார். இந்த பேச்சுவார்த்தையில் முதல் அமைச்சர் கருணாநிதியுடன் துணை முதல் அமைச்சர் மு.க.ஸ்டாலின், எம்.பி.க்கள் கனிமொழி, டி.ஆர்.பாலு, அமைச்சர்கள் துரை முருகன், பொன்முடி ஆகியோர் கலந்து கொண்டனர். காங்கிரஸ் சார்பில் குலாம் நபி ஆசாத்துடன் கே.வி.தங்கபாலு பங்கு கொண்டார். இரவு 9.20 மணி முதல் 11 மணி வரை பேச்சுவார்த்தை நடந்தது.
பேச்சு வார்த்தை முடிந்ததும் முதல் அமைச்சர் கருணாநிதி செய்தியாளர்களுக்கு பேட்டி அளித்தார்.
கேள்வி: காங்கிரஸ் உடனான பேச்சுவார்த்தை எந்த நிலையில் உள்ளது?
பதில்: நாளை (இன்று) மீண்டும் பேசுவார்கள்.
கேள்வி: தி.மு.க. கூட்டணியில் வேறு கட்சிகள் இடம் பெற வாய்ப்பு உள்ளதா?
பதில்: இடமே இல்லை.
இவ்வாறு முதல் அமைச்சர் கருணாநிதி கூறினார்.
No comments:
Post a Comment