தமிழகத்தில் மழையால் பாதிக்கப்பட்ட மக்களுக்கு நிவாரணம் வழங்கவும் சீரமைப்பு பணிகள் மேற்கொள்வதற்கும் முதற்கட்டமாக முதல்வர் கருணாநிதி 100 கோடி ரூபாய் ஒதுக்கியுள்ளார்.
வடகிழக்கு பருவமழையால் தமிழகத்தில் பல இடங்கள் பாதிக்கப்பட்டன. நெற்பயிர்கள் நீரில் மூழ்கின. பாலங்கள் உடைந்தன. மழை வெள்ளத்தால் வீடுகள் பாதிக்கப்பட்டன. விவசாயிகளுக்கு பல கோடி ரூபாய் நஷ்டம் ஏற்பட்டது. பாதிக்கப்பட்ட விவசாயிகள் நஷ்டஈடு வழங்க வேண்டும் என்று அரசுக்கு கோரிக்கை விடுத்தனர்.
இந்நிலையில், மழை பாதிப்புகள் குறித்து விவாதிக்க 30.11.2010 அன்று சென்னை கோட்டையில் முதல்வர் கருணாநிதி தலைமையில் ஆலோசனை கூட்டம் நடந்தது. அதிகாரிகள் கலந்துகொண்டனர்.
இதில் முதல்வர் கூறியதாவது:
பெருமழையால் பாதிக்கப்பட்டுள்ள மாவட்டங்களில் உயிரிழந்தோரின் குடும்பங்களுக்கு தலா 2 லட்ச ரூபாய், கால்நடைகளுக்கு தலா ரூ.10 ஆயிரம் வழங்கவும் தேவையான இடங்களில் உணவு வழங்கவும் நடவடிக்கை எடுத்து வருகிறார்கள். தண்ணீரில் மூழ்கியுள்ள பயிர்களை மதிப்பீடு செய்து சேதம் குறித்த அறிக்கை அனுப்பும் பணியில் மாவட்ட ஆட்சித் தலைவர்கள் ஈடுபட்டுள்ளனர். பாலங்கள், சாலைகள், ஏரிகள் போன்றவற்றில் ஏற்பட்டுள்ள சேதங்களை தற்காலிகமாக சீரமைக்கும் பணிகள் போர்க்கால அடிப்படையில் சம்பந்தப்பட்ட துறையினரால் செய்யப்பட்டு வருகிறது.
மேலும், முழுமையான அளவில் குடிசைகள் சேதம் அடைந்திருந்தால், ஏற்கனவே வழங்கப்பட்டு வந்த 2 ஆயிரம் ரூபாய் என்பதை 5 ஆயிரம் ரூபாயாகவும், பகுதியாக குடிசைகள் சேதம் அடைந்திருந்தால் ஏற்கனவே வழங்கப்பட்டு வந்த ஆயிரம் என்பதை 2 ஆயிரத்து 500 ரூபாயாகவும் உயர்த்தி வழங்கப்படும்.
பெருமழையினால் ஏற்பட்டுள்ள பேரிடர் தொடர்பான நிவாரணம் மற்றும் சீரமைப்புப் பணிகளை மேற்கொள்வதற்காக முதற்கட்டமாக 100 கோடி ரூபாய் ஒதுக்கீடு செய்யப்பட்டுள்ளது.
இவ்வாறு முதல்வர் கூறினார்.
No comments:
Post a Comment