கேகே நகர் பகுதி திமுக செயலாளர் கவுன்சிலர் தனசேகரன் கைது

வணிக வளாகத்தை அபகரிக்க முயன்றதாக கேகே நகர் பகுதி திமுக செயலாளர் தனசேகரன் கைது செய்யப்பட்டார்.

வடபழனி ஆற்காடு சாலையைச் சேர்ந்தவர் ராம் என்பவரின் மனைவி பரமேஸ்வரி. இவர் தனது வீட்டுடன் இணைந்த ரூ.15 கோடி மதிப்புள்ள வணிக வளாகத்தை அடமானமாக வைத்து நிதி நிறுவனத்திடமிருந்து ரூ.2.50 லட்சம் கடனாக வாங்கினார். பின்னர் கடனை அவர் ஒழுங்காக செலுத்த முடியாததால் பரமேஸ்வரிக்கும் அந்த நிதி நிறுவனத்துக்கும் பிரச்சினை ஏற்பட்டது.

இதில் நிதி நிறுவனம் அந்த வணிக வளாகத்தை வேறு நபருக்கு ஏலத்தில் விட்டது. இதனால் பரமேஸ்வரி கோர்ட்டில் நிதி நிறுவனம் மீது சிவில் வழக்கு தொடர்ந்துள்ளார். அந்த வழக்கு நிலுவையில் உள்ளது.

இந்நிலையில், அந்த நிதி நிறுவனத்துக்கு ஆதரவாக கே.கே.நகர் பகுதி திமுக செயலாளரும், கவுன்சிலருமான தனசேகரன் சில ரவுடிகளை வைத்து பரமேஸ்வரியை மிரட்டி வணிக வளாகத்தை அபகரிக்க முயன்றுள்ளார். இதனால் பயந்து போன பரமேஸ்வரி கடந்த ஆண்டு ஜனவரி மாதம் 9ம்தேதி வடபழனி போலீஸ் நிலையத்தில் புகார் செய்தார்.

ஆனால் போலீசார் முறையாக விசாரணை நடத்தவில்லை. இதையடுத்து பரமேஸ்வரி மீண்டும் கடந்த மாதம் 3ம்தேதி வடபழனி போலீஸ் நிலையத்தில் புகார் செய்தார். அந்த புகாரின் பேரில் போலீசார் தீவிர விசாரணை நடத்தினர்.

நில அபகரிக்க முயன்றதாக கடந்த மாதம் 8ம்தேதி தனசேகரன் கூட்டாளிகள் முருகேசன், கோவிந்தராஜன் ஆகியோரை கைது செய்யப்பட்டனர். இதைத் தொடர்ந்து கேகே நகர் 12வது செக்டார் பகுதியில் உள்ள வீட்டில் தனசேகரனை 06.09.2011 அன்று மாலை போலீசார் கைது செய்தனர். அவர் மீது ஆறு பிரிவுகளின் கீழ் வழக்குப்பதிவு செய்யப்பட்டுள்ளது.

மற்றொரு வழக்கில் முன் ஜாமீன் :

இதற்கிடையில் கோவை மத்தியக் குற்றப்பிரிவு போலீசார் நிதி மோசடி வழக்கில், கே.கே. நகர் தனசேகரனை தேடி வந்தனர். இந்த வழக்கில் முன் ஜாமின் கேட்டு சென்னை ஐகோர்ட்டில் தனசேகரன் மனு தாக்கல் செய்தார். அதில், �நான் நிரபராதி. போலீசார் உள் நோக்கத்துடன் பொய் வழக்கு பதிவு செய்துள்ளனர். எனவே முன் ஜாமின் தரவேண்டும்� என கூறியிருந்தார். வழக்கை நீதிபதி வாசுகி 06.09.2011 அன்று விசாரித்து, மனுதாரர் தனசேகரனுக்கு வரும் 9ம் தேதி வரை இடைக்கால முன் ஜாமின் வழங்கி உத்தரவிட்டார்.

மாநகராட்சி நிலம் ஆக்கிரமிப்பா? : குற்றச்சாட்டுக்கு கலைஞர் விளக்கம்

சென்னை மாநகராட்சி நிலத்தை ஆக்கிரமித்துள்ளதாக கூறப்பட்ட குற்றச்சாட்டுக்கு திமுக தலைவர் கருணாநிதி விளக்கம் அளித்துள்ளார். சொத்துக் குவிப்பு வழக்கில் உச்சநீதிமன்ற கட்டளைக்கு ஜெயலலிதா பதில் என்ன என்றும் கேட்டுள்ளார்.

திமுக தலைவர் கருணாநிதி 05.09.2011 அன்று வெளியிட்ட கேள்வி பதில்கள் வருமாறு:

மாநகராட்சிக்கு சொந்தமான 8 கிரவுண்ட் இடத்தை அண்ணா அறிவாலயம் எடுத்துக் கொண்டதைப் போல பேரவையில் குற்றம் சாட்டப்பட்டுள்ளதே?

தமிழக அரசின் வீட்டு வசதித் துறை சார்பில் 5&8&1988ல் அதாவது கவர்னர் ஆட்சிக் காலத்திலேயே அரசாணை எண் 1100 பிறப்பிக்கப்பட்டுள்ளது. அந்த ஆணையில், தி.மு.க. அறக்கட்டளைக்கு அலுவலகம், திருமண மண்டபம், மற்றும் அனாதை இல்லம் கட்டுவதற்கு பின்வரும் நிபந்தனையுடன் அனுமதி அளிக்கப்பட்டது. மொத்த நிலத்தில் பத்து சதவீதமான 1890 சதுர மீட்டர் நிலத்தினை திறந்தவெளி நிலமாக பொது மக்களுக்கான பொழுது போக்குப் பூங்காவாக தி.மு.க. அறக்கட்டளையே பராமரிக்க வேண்டும். மேற்படி பத்து சதவீத இடத்தில் எந்தவிதக் கட்டிடங்களும் கட்டப்படக் கூடாது. இதுதான் அரசாணையில் விதிக்கப்பட்ட நிபந்தனை.

இந்த ஆணையின்படி தி.மு.க. அறக்கட்டளையினால் மாநகராட்சிக்கு ஒதுக்கப்பட வேண்டிய இடம் ஒதுக்கப்பட்டுவிட்டது. அதன் பிறகு அறக்கட்டளை அரசுக்கு அனுப்பிய கடிதத்தில் ஏற்கனவே ஒதுக்கப்பட்டு, மாநகராட்சிக்குத் தரப்பட்ட இடத்திற்குப் பதிலாக அண்ணா அறிவாலயத்தின் முகப்பிலே அதே அளவிற்கான இடத்தை ஒதுக்கித் தர விரும்புவதாகவும், அதற்கு அனுமதி தர வேண்டுமென்றும் கேட்டு, அந்த வேண்டுகோளை ஏற்று தமிழக அரசு 8&1&1998ல் அனுமதியும் கொடுத்தது.

ஆனால் 2001ம் ஆண்டு அ.தி.மு.க. அரசு பொறுப்பேற்ற பிறகு, 28&6&2004 தேதி கடிதத்தில் தி.மு.கழக அறக்கட்டளையினால் மாநகராட்சிக்கு மாற்றிக் கொடுத்த இடத்தை ஏற்றுக்கொள்ள இயலாது என்றும், ஏற்கனவே ஒதுக்கித் தந்த இடத்தைத் தான் தர வேண்டுமென்றும், அதற்கு விளக்கம் அளிக்க வேண்டுமென்றும் கேட்டு எழுதியது.

அரசின் இந்தக் கடிதத்திற்கு தி.மு. கழக அறக்கட்டளை சார்பில் மாநகராட்சிக்காக ஒதுக்கப்பட்ட இடத்திற்குப் பதிலாக எந்தக் காரணத்தினால் மாற்று இடம் தர வேண்டிய தேவை ஏற்பட்டது என்பதையெல்லாம் விளக்கி அரசுக்கு 4&7&2004ல் ஒரு கடிதமும் 3&8&2004ல் மற்றொரு கடிதமும் அனுப் பப்பட்டது.

இதற்கிடையே சென்னை உயர்நீதிமன்றத்தில் தி.மு.கழக அறக்கட்டளை சார்பில் இந்தப் பிரச்சினை தொடர்பாக வழக்கொன்றும் தொடரப்பட்டது. அதில் நீதியரசர், நான்கு வார காலத்திற்கு எதுவும் செய்யக் கூடாது என்றும், அறக்கட்டளையின் கோரிக்கையை அரசு பரிசீலனை செய்து உத்தரவு பிறப்பிக்கலாம் என்றும் தீர்ப்பளித்தார்.

ஆனால் அப்போது ஆட்சியில் இருந்த அ.தி.மு.க. அரசு தாங்கள் ஆட்சியிலிருந்து வெளியேறிய மே 2006 வரை நீதிபதி கூறியதற்கொப்ப எந்த ஆணையும் பிறப்பிக்கவில்லை. பிரச்சினையை அப்படியே விட்டு விட்டுச் சென்று விட்டார்கள். அதன் பிறகு சென்னை மாநகர் வளர்ச்சிக் குழுமமும், சென்னை மாநகராட்சியும் இணைந்து குறிப்பிட்ட இடத்தை நேரில் பார்த்து ஆய்வு மேற்கொண்டதன் அடிப்படையில்

7&12&2007ல் அரசின் சார்பில் இது தொடர்பாக பிறப்பிக்கப்பட்ட ஆணையில், இந்தப் பிரச்சினை யில் மேல் நடவடிக்கையைக் கைவிடுவதென்றும், விளக்கம் கேட்டு அ.தி.மு.க. அரசு அனுப்பிய கடிதத்தின் மீது எந்த நடவடிக்கையும் தேவையில்லை என்றும், மாநகராட்சிக்காக ஒதுக்கப்பட்ட இடத்தில் எந்தவிதமான கட்டுமானப் பணிகளையும் மேற்கொள்ளாமல் திறந்தவெளியாகவே பராமரித்திட வேண்டுமென்றும் தெரிவிக்கப் பட்டது.

இதுதான் அண்ணா அறிவாலயத்தில் சென்னை மாநகராட்சிக்காக ஒதுக்கப்பட்ட இடம் பற்றிய முழு விவரமாகும்.

அ.தி.மு.க. உறுப்பினர்களும் அமைச்சர்களும் பேசும்போது ஏதாவது குறை சொல்ல வேண்டுமென்பதற்காக இல்லாத பொல்லாத கதைகளையெல்லாம் சொல்கிறார்களே?

என் வீட்டிற்குப் பின்னால் உள்ள ஓர் சிறு இடத்தைப் பற்றி திரும்பத் திரும்ப அதைப் பற்றிய விளக்கத்தை நான் கொடுத்திருந்த போதிலும் நேற்றையதினம் பேரவையில் ஒரு அமைச்சர் புகார் கூறியிருக்கிறார்.

அ,தி.மு.க. உறுப்பினர் ஒருவர் அதற்காக சிறப்பு கவன ஈர்ப்புத் தீர்மானம் கொண்டு வந்து, அதை அவையிலே எழுப்ப பேரவைத் தலைவர் அவசர அவசரமாக அனுமதி கொடுத்துள்ளார்.

அ.தி.மு.க. உறுப்பினர் ஒருவர் சென்னை மாநகராட்சியில் அரசுக்குச் சொந்தமான கால்வாய் புறம்போக்கு போன்ற அரசு நிலங்களில் அதிகார வர்க்கத்திலிருந்த சிலர் வீடு மற்றும் நிலையான கட்டடங்கள் கட்டி ஆக்கிரமிப்பு செய்துள்ளது குறித்து சிறப்பு கவன ஈர்ப்புத் தீர்மானம் கொண்டு வந்திருக்கிறார்.

அந்தச் சிறப்பு கவன ஈர்ப்புத் தீர்மானத்தில் பேசிய அ.தி.மு.க. உறுப்பினர் மற்ற யாரைப் பற்றியும் பேசாமல் என்னுடைய வீட்டிற்குப் பின்னால் உள்ள ஒரு கால்வாய் புறம்போக்கு நிலம் என்று கூறப்படும் 13 அடிகள் மட்டுமே அகலம் கொண்ட ஒரு சிறு இடத்தைப் பற்றி அவையிலே நீண்ட விவாதம் நடைபெற்றுள்ளது. உறுப்பினர் அவையிலே பேசும்போது, 1967ல் கருணாநிதிக்கு அவர் வீட்டிற்குப் பின்னால் இருக்கிற 60க்கு 13 என்ற இடம் தேவைப்படுகிறது.

அது கால்வாய் இடம். அந்த இடத்தை அவருக்கு விலைக்குக் கொடுக்கலாம் என்று சென்னை மாநகராட்சியில் ஒரு தீர்மானம் போட்டு அனுப்புங்கள் என்று மாநகராட்சிக்கு மாவட்ட ஆட்சித் தலைவர் ஒரு கடிதம் அனுப்புகிறார். உடனே சென்னை மாநகராட்சியும் அந்த இடத்தில் ரூ. 3,250 என்று அந்தக் காலத்தில் விலையை நிர்ணயம் செய்கிறது. கருணாநிதிக்குக் கொடுக்கப்பட்டு விடுகிறது. அவருக்குக் கொடுக்கும்போதே அந்த நிலம் கால்வாய்ப் பகுதி என்றும், மாநகராட்சி ஊழியர்கள் எப்போது வேண்டுமானாலும் அங்கே வந்து அந்தக் கால்வாய்ப் பகுதியைச் சுத்தம் செய்வார்கள் என்ற ஒரு நிபந்தனையுடன் அந்த இடம் அவருக்குக் கொடுக்கப் பட்டது என்று இதையெல்லாம் குற்றச்சாட்டாகக் கூறுகிறார். இது குற்றச்சாட்டா? நிலை விளக்கமா?

அ.தி.மு.க. உறுப்பினர் பேசியதாக அவர்களுடைய கட்சி ஏட்டிலே இதுதான் வந்துள்ளது. இந்த இடத்தைத்தான் நான் பின்னர் முதலமைச்சராகப் பொறுப்பேற்ற பிறகு, நான் வசிப்பதற்காக அரசு ஒதுக்கிய கொடநாடு மாளிகை போன்ற பெரிய பெரிய வீடுகளுக்கெல்லாம் செல்லாமல், ஏற்கனவே நான் வாழ்ந்த சிறிய தெரு வீட்டிலேயே தங்கிய காரணத்தால், பாதுகாப்பிற்காக நியமிக்கப்பட்ட காவல் துறை அலுவலர்கள் மாநகராட்சிக்குச் சொந்தமான அந்த இடத்தில் ஓய்வு நேரத்தில் உட்கார்ந்திருப்பதற்காகப் பயன்படுத்தி வருகிறார்கள்.

இதைத்தான் நான் ஏதோ திட்டமிட்டு ஆக்கிரமித்து வைத்திருப்பதாகவும், அந்த இடத்திலே கட்டிடம் கட்டியிருப்பதாகவும் பேரவையிலே பேசியிருக்கிறார்கள். பேரவை உறுப்பினர்கள் எப்போது வேண்டுமானாலும் அல்லது இப்போதே கூட நேரில் வந்து அந்த இடத்தைப் பேரவைத் தலைவர் தலைமையிலே காணலாம். நான் என்னுடைய சொந்த வீட்டையே நான் வாழும் காலத்திற்குப் பிறகு என் குடும்பத்திற்கு வேண்டாமென்று கூறி அதனை அறக்கட்டளைக்கு எழுதிக் கொடுத்துவிட்டேன். ஆனால் மாநகராட்சிக்குச் சொந்தமான இடத்தை நான் ஆக்கிரமித்துக் கொண்டதாக அ.தி.மு.க. வினர் குற்றம் கூறி, அதற்குரிய அமைச்சர் பேரவையிலே பதில் சொல்லியிருக்கிறார்.

மேலும் அந்தத் துறைக்கான அமைச்சர் தனது பதில் உரையில், சென்னை மாநகராட்சியின் பழைய செட்டில்மெண்ட் பகுதிகளான சைதாப்பேட்டை, மயிலாப்பூர், திருவல்லிக்கேணி, மற்றும் தியாகராயர்நகர் போன்ற பகுதிகளில் குப்பை மற்றும் கழிவுகளை அகற்றுவதற்காக அதற்கென நியமிக்கப்பட்ட துப்புரவுத் தொழிலாளர்கள் சென்று பணியாற்ற தனி சந்துகள் பராமரிக்கப்பட்டு வந்தன.

காலப் போக்கில் திடக் கழிவு மற்றும் கழிவு நீர் அகற்றும் பணிகள் இயந்திரங்களாலும் மற்றும் பாதாள சாக்கடை மூலமாகவும் அகற்றப்படும் வகையில் நவீனமயமாக்கப்பட்டதால் இச்சந்துகள் பயன்பாடின்றி சென்னை மாநகரின் பல்வேறு மண்டலங்களிலும் உள்ளன என்றுதான் தொடங்குகிறார். இதிலிருந்தே அது சந்து என்பதும், எதற்காகப் பயன்பட்டது என்பதும் தெளிவாக்கப்பட்டுள்ளது.

மேலும் அமைச்சர் தனது பதிலில் இது போன்ற சந்துகள் கோபாலபுரத்தில் இருக்கின்றன என்றும்; அதிலே ஒன்றுதான் என்னுடைய வீட்டின் பின்புறத்திலே உள்ளது என்றும் கூறியிருக்கிறார். கோபாலபுரத்தில் என் வீட்டிற்குப் பின்னால் உள்ள அந்தச் சந்து போன்ற பகுதிகளையெல்லாம் அந்தத் தெருவிலே உள்ள அனைவருமேதான் பராமரித்து வருகிறார்கள்.

என் மீது குற்றஞ்சாட்டிய அந்த அ.தி.மு.க. உறுப்பினரையும், அமைச்சரையும் கேட்கிறேன். உங்கள் முதல் அமைச்சரின் கதை என்ன? அதைப்பற்றி உங்கள் தோழமைக் கட்சியான மார்க்சிஸ்ட் கம்யூனிஸ்ட் கட்சியின் தலைவர்கள் ஊர்வலமாக தலைமைச் செயலகத்திற்கே வந்து சிறுதாவூரில் தலித்களுக்காக கொடுக்கப்பட்ட இடத்தை ஜெயலலிதாவும் அவருக்கு வேண்டியவர்களும் ஆக்கிரமித்துக் கொண்டார்கள் என்று புகார் மனு கொடுத்தார்களா, இல்லையா?

அதன் மீது விசாரணை நடத்த நியமிக்கப்பட்ட நீதியரசர் சிவசுப்ரமணியம் கமிஷன் அவ்வாறு ஆக்கிரமிப்பு நடந்தது உண்மை என்று அறிக்கை கொடுத்ததா, இல்லையா? கொடநாடு விவகாரம் என்ன? சிறுதாவூரில் ஜெயலலிதாவிற்கு மிகவும் வேண்டப்பட்டவர் பெயரிலே உள்ள மாளிகை, அரசுக்குச் சொந்தமான புறம்போக்கு நிலத்தை வளைத்து ஆக்கிரமித்துச் சுற்றுச் சுவர் எழுப்பி கட்டப்பட்டிருக் கிறதா இல்லையா? அந்த இடங்களையெல்லாம் அந்தத் துறையின் அமைச்சர் எப்போது கைப்பற்றப் போகிறார்? பேரவையில் பதில் சொல்வாரா?

என்னைப் பற்றிய இரண்டு பிரச்சினைகளுக்கும் நான் விளக்கம் அளித்திருக்கிறேன். சமச்சீர் கல்விப் பிரச்சினையிலும் சொத்துக் குவிப்பு வழக்கிலும் உச்ச நீதிமன்றக் கட்டளைக்கு ஜெயலலிதாவின் விளக்கம் என்ன?

இவ்வாறு கருணாநிதி கூறியுள்ளார்.

திமுக உறுப்பினர்கள் கூண்டோடு வெளியேற்றம் : சட்டமன்ற ஜனநாயக மரபு நீர்த்து போகிறது - துரைமுருகன்

சட்டப் பேரவையில் திமுக உறுப்பினர்கள் 06.09.2011 அன்று கூண்டோடு வெளியேற்றப்பட்டனர். �திமுக உறுப்பினர்களை பேசவிடாமல் செய்வதன்மூலம் சட்டமன்ற ஜனநாயக மரபு கொஞ்சம், கொஞ்சமாக நீர்த்து போகிறது” என்று துரைமுருகன் கூறினார்.
அமைச்சர் ந.சுப்பிரமணியன் சொன்ன கதைக்கு திமுக உறுப்பினர்கள் எழுந்து நின்று, ‘�இதற்கு நாங்கள் விளக்கம் சொல்ல வேண்டும். எங்களுக்கு பேச அனுமதி தர வேண்டும்” என்று குரல் கொடுத்தனர். பேச அனுமதிக்க வேண்டும் என்று பேரவை தலைவரிடம் கேட்டனர். ஆனால், “அமைச்சர் பதில் அளித்து கொண்டு இருக்கிறார். அனைவரும் அமருங்கள்’’ என்று பேரவை தலைவர் கூறினார். ஆனால் திமுக உறுப்பினர்கள் அமர மறுத்து, பேச அனுமதிக்க வேண்டும் என்று குரல் கொடுத்துக் கொண்டே இருந்தனர். அதை எதிர்த்து அதிமுக உறுப்பினர்கள் எழுந்து சத்தம் போட்டனர்.

அமைச்சர் செங்கோட்டையன்:

அமைச்சர் பேசும்போது இடைமறித்து அவை நடவடிக்கைக்கு இடைஞ்சல் ஏற்படுத்துகிறார்கள். அதற்கு அனுமதிக்க கூடாது.

அமைச்சர் கே.பி.முனுசாமி:

இன்று திமுக உறுப்பினர்கள் எழுந்து நின்று குரல் கொடுக்கிறார்கள். நேற்றும் அவர்கள் தலைவர் பற்றி பேசும்போது இப்படி எழுந்து நின்று குரல் கொடுத்து இருந்தால் பாராட்டியிருப்போம். (திமுக உறுப்பினர்கள் எதிர்ப்பு).

ஓ.பன்னீர்செல்வம்:

உறுப்பினர்கள் ஏதாவது பேச முற்பட்டால் பேசலாம். அதை விட்டுவிட்டு கையை நீட்டி பேசுவதை ஏற்க முடியாது.

பேரவைத் தலைவர்:

அமருங்கள், இல்லாவிட்டால் வெளியேற்றப்படுவீர்கள்.

திமுக உறுப்பினர்கள் தொடர்ந்து எதிர்ப்பு குரல் கொடுத்து கொண்டு இருந்ததால் அவர்களை வெளியேற்ற சபை காவலர்களுக்கு சபாநாயகர் உத்தரவிட்டார். திமுக உறுப்பினர் சிவசங்கரன் தொடர்ந்து சத்தம் போட்டு எதிர்ப்பு தெரிவித்தார். அவரை சபையில் இருந்து வெளியேற்ற சபை காவலர்களுக்கு பேரவைத் தலைவர் உத்தரவிட்டார்.

செங்கோட்டையன்:

சிவசங்கரனை வெளியேற்றும் காவலர்களை அவர் அடிக்கிறார்.

பேரவை தலைவர்:

காவலர்களை அடித்ததாக புகார் பெற்று அவர் மீது நடவடிக்கை எடுக்கப்படும். (திமுக உறுப்பினர்கள் தொடர்ந்து எதிர்ப்பு தெரிவித்ததால் அமளி ஏற்பட்டது. அதிமுக உறுப்பினர்களும்குரல் கொடுத்தனர்).

பேரவைத் தலைவர்:

இறுதியாக எச்சரிக்கிறேன். எல்லாரும் அமருங்கள். (அப்போது கூச்சல் அதிகரித்தது.) இதையடுத்து, திமுக உறுப்பினர்கள் அனைவரையும் வெளியேற்றுமாறு பேரவைத் தலைவர் உத்தரவிட்டார். திமுக உறுப்பினர்கள் எ.வ.வேலு, ஜெ.அன்பழகன், தங்கம் தென்னரசு, மைதீன்கான், சக்கரபாணி ஆகியோர் பேச வாய்ப்பு அளிக்குமாறு கேட்டனர்.

பேரவை தலைவர்:

அன்பழகனை வெளியேற்றுங்கள். பின்வரிசையில் இருக்கும் திமுக உறுப்பினர் களையும் வெளியேற்றுங்கள் என்று உத்தரவிட்டார். இதையடுத்து அவைக் காவலர்கள் திமுக உறுப்பினர்கள் அனைவரையும் வெளியேற்றினார்கள்.

பேரவையில் இருந்து 06.09.2011 அன்று திமுக உறுப்பினர்கள் கூண்டோடு வெளியேற்றப்பட்டனர். பின்னர் பேரவை வளாகத்தில் பேரவை திமுக துணை தலைவர் துரைமுருகன் அளித்த பேட்டி:

வழக்கமாக நாங்கள்தான் வெளியேறுவோம். ஆனால், சபாநாயர் எங்களை வெளியேற்றியிருக்கிறார். இன்றைக்கு அமைச்சர் மானிய கோரிக்கைக்கு பதில் அளித்துள்ளார். மானிய கோரிக்கைக்கு பதில் அளிப்பது என்பது வேறு. ஆனால், திமுகவை வசைபாடுவதையே அறிக்கை முழுவதும் படித்துள்ளார். அதிலே வரிக்கு வரி திமுகவினர் மீதும், கருணாநிதி பற்றியும் தரக்குறைவாக பேசியிருக்கிறார். அதையும் மிஞ்சி கதை சொல்கிறேன் என்று, மேதாவித்தனமாக முற்பட்டு அந்த கதையில் சபையில் இல்லாதவர் பெயர்களை இழுத்து பேசியிருக்கிறார்கள்.

அவையிலே இருக்கின்ற ஒரு உறுப்பினரை பற்றி இன்னொரு உறுப்பினர் குற்றச்சாட்டை சாட்டுவது சட்டப்படி தவறு. சபாநாயகர் அதை அனுமதிக்க கூடாது. ஆனால், திமுக தலைவர் கருணாநிதி, மு.க.ஸ்டாலின் பற்றி குற்றச்சாட்டுகளை அளவற்று சொல்லிக்கொண்டே போவது முறை தானா என்று உறுப்பினர் கேட்டார்கள்.

2வதாக அவையில் இல்லாதவரை பற்றி பதில் சொல்லுகின்ற வாய்ப்பு அவர்களுக்கு இல்லாத காரணத்தினால் அவர்களை பற்றியும் பேசக் கூடாது. ஆனால், மத்திய அமைச்சர் அழகிரி பற்றி பேசியது கண்டிக்கத்தக்கது. இதை அவைக் குறிப்பில் இருந்து நீக்க வேண்டும் என்று கூறினோம். நீக்க மறுத்ததால் வெளியேறுகிறோம் என்று உறுப்பினர்கள் சொன்னார்கள். ஆனால், கையை தூக்கினார்கள், �விரலை காட்டினார்கள். ஆகையால் வெளியேற்றினோம்� என்று சொல்லுகிறார்கள்.

ஆக சட்டமன்ற ஜனநாயக மரபு கொஞ்சம் கொஞ்சமாக நீர்த்து போகிறது. இது நல்லதல்ல. எதிர்த்து குரல் கொடுப்பதே சட்டமன்றத்தில் இருக்க கூடாது என்ற நிலை இருந்தால் ஜனநாயகம் எங்கே இருக்கும்.

இவ்வாறு துரைமுருகன் கூறினார்.

அக்.13 திருச்சி இடைத்தேர்தல் : தேர்தல் கமிஷன் அதிகாரப்பூர்வ அறிவிப்பு

அமைச்சர் மரியம்பிச்சை மறைவையொட்டி திருச்சி மேற்கு தொகுதி இடைத்தேர்தல் அக்டோபர் 13ம் தேதி நடைபெறும் என தேர்தல் ஆணையம் அறிவித்துள்ளது.

திருச்சி மேற்கு தொகுதியில் அதிமுக வேட்பாளராக போட்டியிட்டு வென்று, அதிமுக அரசின் அமைச்சரவையில் இடம்பிடித்தவர் மரியம்பிச்சை. சிறுபான்மை பிரிவு மற்றும் சுற்றுச்சூழல் துறை அமைச்சராக பொறுப்பேற்ற இவர், கடந்த மே 23ம் தேதி காரில் சென்னைக்கு புறப்பட்டு சென்றபோது, திருவடக்குறிச்சி பகுதியில் லாரி மீது கார் மோதியதில் அமைச்சர் மரியம்பிச்சை இறந்தார்.

இந்நிலையில், திருச்சி மேற்கு தொகுதி எம்எல்ஏவை தேர்ந்தெடுப்பதற்கான இடைத்தேர்தல் வரும் அக்டோபர் 13ம் தேதி நடைபெறும் என தேர்தல் ஆணையம் அறிவித்துள்ளது.

இது தொடர்பாக 06.09.2011 அன்று தேர்தல் ஆணையம் வெளியிட்டுள்ள அறிவிப்பில், திருச்சி மேற்கு தொகுதிக்கான தேர்தல் விதிகள் உடனடியாக நடைமுறைக்கு வருவதாக தெரிவித்துள்ளது. 19ம் தேதிமனு தாக்கல் தொடங்குகிறது. 26ம் தேதி வேட்புமனுக்களை தாக்கல் செய்ய இறுதி நாள். 27ம் தேதி வேட்புமனுக்கள் பரிசீலனை நடைபெறுகிறது. வேட்புமனுக்களை திரும்ப பெறுவதற்கு 29ம் தேதி இறுதி நாள். வரும் அக்டோபர் 13ம் தேதி காலை 8 முதல் மாலை 5 மணி வரை வாக்குப்பதிவு நடைபெறுகிறது. 17ம் தேதி வாக்கு எண்ணிக்கை நடத்தப்பட்டு அன்றே தேர்தல் முடிவு அறிவிக்கப்படும்” என்று தெரிவிக்கப்பட்டுள்ளது.

வேட்புமனு தாக்கல் - செப். 19

மனு தாக்கல் செய்ய இறுதி நாள் - செப். 26

மனு பரிசீலனை - செப். 27

மனு வாபஸ் பெற கடைசி நாள் - செப். 29

வாக்குப்பதிவு நாள் - அக். 13

வாக்கு எண்ணிக்கை - அக். 17

உள்ளாட்சி தேர்தல்கள் வரும் அக்டோபர் 20ம் தேதிக்குள் நடைபெறலாம் என்று எதிர்பார்க்கப்படும் நிலையில், அத்துடன் திருச்சி மேற்கு சட்டப்பேரவை தொகுதிக்கான இடைத்தேர்தலும் நடைபெறலாம் என அரசியல் நோக்கர்கள் கூறி வந்தனர். இந்நிலையில் முன்கூட்டியே இடைத்தேர்தல் தேதி அறிவிக்கப்பட்டுள்ளது.

பிற மாநிலங்கள்:

ஆந்திராவில் பன்ஸ்வாடா தொகுதி, அரியானாவில் ஹிசார், மகாராஷ்டிராவில் கடாக்வாசலா, பீகாரில் தரண்டா ஆகிய சட்டப்பேரவை தொகுதிகளுக்கும் அக்டோபர் 13ம் தேதி இடைத்தேர்தல் நடக் கிறது.

புதுச்சேரி:

புதுச்சேரி மாநிலத்தில் கடந்த சட்டமன்ற தேர்தலில் இந்திரா நகர், கதிர்காமம் ஆகிய தொகுதிகளில் போட்டியிட்ட ரங்கசாமி வெற்றி பெற்றார்.

பெரும்பான்மை எம்எல்ஏக்களுடன் ஆட்சியை பிடித்து முதல்வராகவும் ரங்கசாமி பெறுப்பேற்றார். கடந்த மே 23ம் தேதி இந்திரா நகர் தொகுதி எம்எல்ஏ பதவியை ராஜினாமா செய்தார்.

இந்திரா நகர் தொகுதிக்கும் அக்டோபர் 13ம் தேதி இடைத்தேர்தல் நடக்கிறது. அக்டோபர் 17ம் தேதி வாக்குகள் எண்ணப்பட்டு முடிவு அறிவிக்கப்பட உள்ளது. உடனடியாக தேர்தல் நடத்தை விதிகள் அமலுக்கு கொண்டு வந்துள்ளதாக தேர்தல் ஆணையம் அறிவித்துள்ளது.

கே.என்.நேருவின் தம்பி ராமஜெயம் கைது

நில அபகரிப்பு வழக்கில் தேடப்பட்ட முன்னாள் அமைச்சர் கே.என்.நேருவின் தம�பி ராமஜெயம் 05.09.2011 அன்று அதிகாலை கொச்சி விமான நிலையத்தில் கைது செய்யப்பட்டார்.

திருச்சி சத்திரம் பஸ் நிலையம் அருகே கலைஞர் அறிவாலயம் சில ஆண்டுகளுக்கு முன் கட்டப்பட்டது. இதற்காக திருச்சி மாவட்டம் துறையூரை சேர்ந்த டாக்டர் சீனிவாசன் என்பவரிடம் 12 ஆயிரம் சதுர அடி நிலம் வாங்கப்பட்டது. முன்னாள் அமைச்சர் கே.என்.நேரு உள்ளிட்ட சிலர் தன்னை மிரட்டி நிலத்தை அபகரித்து கொண்டதாக திருச்சி போலீஸ் கமிஷனர் மாசானமுத்துவிடம் டாக்டர் சீனிவாசன் புகார் அளித்தார். இதையடுத்து மாநகர குற்றப்பிரிவு போலீசார் முன்னாள் அமைச்சர் கே.என்.நேரு, அவரது தம்பியும் தொழில் அதிபருமான ராமஜெயம் உட்பட 11 பேர் மீது 9 பிரிவுகளின் கீழ் வழக்குப்பதிவு செய்தனர்.

கடந்த 25ம் தேதி கே.என்.நேரு உட்பட 10 பேரை போலீசார் கைது செய்தனர். ராமஜெயம் மட்டும் தலைமறைவாகிவிட்டார். அவரை, பொன்மலை உதவி கமிஷனர் சீனிவாசன் தலைமையிலான தனிப்படை போலீசார் தேடி வந்தனர். இந்நிலையில் 05.09.2011 அன்று அதிகாலை துபாய் செல்வதற்காக கொச்சி விமானநிலையத்திற்கு வந்த ராமஜெயத்தின் பாஸ்போர்ட்டை இமிகிரேசன் போலீசார் சோதனையிட்டனர். அப்போது அவரது பாஸ்போர்ட் நம்பர் நிறுத்தி வைக்கப்பட்டு இருந்தது தெரியவந்தது.

இதையடுத்து இமிகேரசன் போலீசார், ராமஜெயத்தை கொச்சின் விமான நிலையத்திற்குட்பட்ட நெடும்பாசேரி போலீஸ் ஸ்டேசனில் ஒப்படைத்தனர். நெடும்பாசேரி போலீசார், திருச்சி மாநகர போலீசாருக்கு தகவல் கொடுத்தனர். தனிப்படை போலீசார் கொச்சி சென்று ராமஜெயத்தை அழைத்து வந்து கல்யாண மண்டபம் ஒன்றில் தங்க வைக்கப்பட்டார்.

05.09.2011 அன்று காலை 6 மணிக்கு திருச்சி ஜே.எம்.4 நீதிமன்றத்தில் ராஜஜெயம் ஆஜர்படுத்தப்பட்டார். வழக்கை விசாரித்த நீதிபதி உஷாராணி, இவரை திருச்சி சிறையில் 15 நாட்கள் அடைக்க உத்தரவிட்டார்.

திருச்சி சிறையில் இடமில்லை என்று ராமஜெயத்தை பாளைங்கோட்டை சிறையில் அடைத்தனர்.

உள்ளாட்சி தேர்தல் பணி தற்காலிக பொறுப்பு குழு உறுப்பினர்கள் நியமனம்

திமுக மாவட்ட செயலாளர்கள் சிறையில் இருப்பதால் உள்ளாட்சி தேர்தல் பணியை சிறப்பாக செய்ய திமுக தற்காலிக பொறுப்புக்குழு உறுப்பினர்கள் நியமிக்கப்பட்டுள்ளனர்.

இதுகுறித்து, திமுக பொதுச் செயலாளர் க.அன்பழகன் 05.09.2011 அன்று இரவு வெளியிட்டுள்ள
அறி க்கை:

திருவாரூர் மாவட்ட திமுக செயலாளர் பூண்டி கலைவாணன் மீது அதிமுக அரசு பொய் வழக்கு தொடர்ந்து சிறையில் அடைத்துள்ளதால் உள்ளாட்சி தேர்தல் உள்ளிட்ட மாவட்ட கழக பணிகள் செவ்வனே நடைபெற பொறுப்புக்குழு தற்காலிகமாக நியமிக்கப்படுகிறது.

திருவாரூர் மாவட்ட பொறுப்புக்குழு உறுப்பினர்களாக எம்.எஸ்.கார்த்திக், உ.மதிவாணன், அழகு திருநாவுக்கரசு, கோட்டூர் அ.ராஜசேகரன், எஸ்.ஜோதிராமன் நியமிக்கப்பட்டுள்ளனர்.

விழுப்புரம் மாவட்ட செயலாளர் பொன்முடி சிறையில் உள்ளதால் இ.ராதாமணி, கே.எஸ்.மஸ்தான், தா.உதயசூரியன் பொறுப்புக்குழு உறுப்பினராக நியமிக்கப்படுகின்றனர்.

திருச்சி மாவட்ட செயலாளர் கே.என்.நேரு சிறையில் உள்ளதால் எஸ்.ஏ.அம்பிகாபதி, கே.கே.எம்.தங்கராஜா, கே.என்.சேகரன் தற்காலிகமாக நியமிக்கப்பட்டிருக்கின்றனர்.

சேலம் மாவட்ட செயலாளர் வீரபாண்டி எஸ்.ஆறுமுகம் சிறையில் இருப்பதால் டாக்டர் ஜி.எஸ்.சூடாமணி, எஸ்.ஆர்.சிவலிங்கம், வீரபாண்டி ஆ.ராஜேந்திரன், ஏ.மாரியப்பன், ஜி.கே.சுபாசு ஆகியோர் தற்காலிக பொறுப்புக்குழு உறுப்பினராக நியமிக்கப்படுகின்றனர்.

இவ்வாறு அறிக்கையில் தெரிவிக்கப்பட்டுள்ளது.

கே.என்.நேருவை 3 நாள் கஸ்டடி கேட்ட போலீசாரின் மனு தள்ளுபடி

நில அபகரிப்பு வழக்கில் சிறையில் அடைக்கப்பட்டுள்ள முன் னாள் அமைச்சர் நேருவை போலீஸ் காவலில் எடுத்து விசாரிக்க கோரிய மனுவை கோர்ட் நிராகரித்தது.

திருச்சி சத்திரம் பஸ் நிலையம் அருகே கலைஞர் அறிவாலயம் கட்டுவதற்காக நிலம் வாங்கியது தொடர் பாக துறையூரை சேர்ந்த டாக்டர் சீனிவாசன் கொடு த்த புகாரின்பேரில் முன் னாள் அமைச்சர் நேரு உள் பட 10 பேர் கைது செய்யப்பட்டு சிறையில் அடைக்கப்பட்டுள்ளனர். இதற்கிடையில் நேருவை 5 நாள் போலீஸ் காவலில் எடுத்து விசாரிக்க திருச்சி நில மோ சடி தடுப்பு பிரிவு டிஎஸ்பி மாத வன் ஜெ.எம்.4 கோர்ட்டில் மனுதாக்கல் செய்திருந்தார்.

இதன் விசாரணை 05.09.2011 அன்று நடந்தது. இதற்காக கடலூர் சிறையில் இருந்து நேரு, திருச்சி அழைத்து வர ப்பட்டார். காலை 10.45மணி க்கு ஜெ.எம்.4 நீதிபதி புஷ்ப ராணி முன் நேரு ஆஜர்படுத்தப்பட்டார். விசாரணையின்போது, போலீஸ் கஸ் டடி விசாரணைக்கு செல்கிறீர்களா? என நேருவிடம் நீதிபதி கேட்டார். அதற்கு, போலீஸ் கஸ்டடியில் செல்ல விருப்பமில்லை. கோர்ட்டிலேயே விசாரணை நடத்துங்கள் என நேரு கூறினார். நேரு சார்பில் வக்கீல் அருள் மொழி வர்மன் ஆஜராகி வாதாடியது:

இந்த வழக்கில் கைது செய்யப்பட்டுள்ள குடமுருட்டி சேகர் திருச்சி அருகே நடைபெற்ற இரட்டை கொ லைச் சம்பவம் தொடர்பாக சிபிசிஐடி போலீசாரால் விசாரிக்கப்பட்டவர். எனவே போலீசார் நேருவை போலீஸ் காவலில் எடுத்து அந்த வழக்கு தொடர்பான ஆவணங்களில் கையெழுத்து பெற வாய்ப்பு உண்டு. அதேபோல் இந்திய தண்ட னைச் சட்டம் 167(3)ன்படி ஒருவரை போலீஸ் காவலில் வைத்து விசாரிக்க அனுமதி கோரும் போது எந்த காரணத்திற்காக அவரை கஸ்டடி எடுக்கிறோம் என குறிப்பிடவேண்டும்.

ஆனால் போலீசார் கொடுத்துள்ள மனுவில் அவ்வாறு எந்த காரணமும் குறிப்பிடவில்லை. மேலும் ஏற்கனவே இவ்வழக்கில் கைது செய்யப்பட்ட அன்பழகன் மற்றும் குடமுருட்டி சேகர் ஆகியோரை போலீ சார் காவலில் வைத்து விசா ரிக்க முயற்சி மேற்கொண்டனர். அனுமதி கிடைக்கவில் லை என்பதால் தற்போது நேருவை காவலில் எடுக்க முயற்சி செய்கின்றனர். இதற்கும் அனுமதி கிடைக்கவில்லை என்றால் அடுத்த நபரை காவலில் கேட்பார்கள்.

போலீஸ் காவல் தொடர் பான எந்தவித காரணத்தை கூறாதவரை கோர்ட் அனுமதி கொடுக்க கூடாது என வாதிட்டார்.

முதல் வகுப்பு மறுப்பு :

முன்னாள் அமைச்சர் நேரு ஒரு விஐபி அந்தஸ்தில் இருப்பவர். அவருக்கு சிறையில் முதல் வகுப்பு வழங்க வேண்டும் என்கிற கோரிக்கையை கோர்ட் ஏற்றுக்கொண்டு முதல் வகுப்பு வழங்கலாம் என கூறியது. ஆனால் முதல் வகுப்பு வழங்க வேண்டும் என உத்தரவு இருந்தால் மட்டுமே முதல் வகுப்பு வழங்க முடியும் என சிறை அதிகாரிகள் கூறுகின்றனர் என வக்கீல் அருள்மொழி வர்மன் கூறினார்.

ஆதரவாளர்களை கட்டுப்படுத்த முடியாமல் போலீசார் திணறல் :

முன்னாள் அமைச்சர் செல்வராஜ், என்.கே.கே.பி.ராஜா, திமுக வெளியீட்டு செயலானர் திருச்சி செல்வேந்திரன் உள்பட திமுகவினர் ஏராளமானோர் கோர்ட் முன்பு கூடியிருந்தனர். ஜெயலலிதாவுக்கு எதிராக கோஷங்கள் எழுப்பினர். போலீசாரால் கூட்டத்தை கட்டுப்படுத்த முடியவில்லை.

போலீசாரால் சமாளிக்க முடியாததைப் பார்த்த கே.என்,நேரு, வேனை விட்டு இறங்கி தனது ஆதரவாளர்களை சமாதானப்படுத்தினார்.