திராவிட இயக்கதின் ஆற்றல் மிக்க சிந்தனையாளர், நாத்திகச் செம்மல் பத்திரிக்கை ஜாம்பவான் எழுத்துலகின் முடிசூடா மன்னராகத் திகழ்ந்த திரு.சின்னகுத்தூசி(எ) இரா.தியாரகராஜன் அவர்கள் 22.5.2011 அன்று காலை 7.50 மணிக்கு சென்னையில் மாரடைப்பால் காலமானார். அவருக்கு வயது 77.
கடந்த ஓராண்டு காலமாக சென்னை பில்ராத் தனியார் மருத்துவமனையில் உயர்சிகிச்சைப் பெற்றுக்கொண்டிருந்த நிலையிலும், அனல் பறக்கும் அரசியல் கட்டுரைகளை தொடர்ந்து எழுதி வந்தார். தன் உடல்நிலை மிகவும் நலிவுற்ற நிலையில் இருந்தபோதிலும் தன்னை சந்தித்திட வருகை தந்த பத்திரிகை நண்பர்கள், அரசியல் நண்பர்களிடம் நாட்டுநிலைமை, அரசியல் நிலைமை, பற்றியெல்லாம் மணிக்கணக்கில் அழுத்தம் திருத்தமாக விவாதித்து வந்தார். என்பது குறிப்பிடத்தக்கது.
(முதல்வர்) கலைஞர் அவர்கள் தனது அரசாங்க நிகழ்வுகள், சட்டமன்ற நிகழ்வுகள், தேர்தல் நிகழ்வுகள் என்று பல்வேறு அயராதப் பணிகளுக்கு மத்தியிலும பில்ராத் மருத்துவமனைக்கு பலமுறை நேரில் வருகைதந்து திரு. குத்தூசி அவர்களுடன் கலந்துரையாடி அவரது உடல்நலனில் அக்கறை காட்டியதன் மூலம் அவர்கள் இருவரிடையே இருந்த நட்பு எத்தகைய வலிமை மிக்கது என்பதை உணரமுடியும்.
இதேபோல் (துணை முதல்வர்) மு.க.ஸ்டாலின் அவர்களும் தமிழகம் முழுவதும் சுற்றிச் சுழன்று ஆட்சிப்பணி, கட்சிப்பணிகளில் ஈடுபட்டிருந்த நிலையிலும் பல முறை நேரில் வருகைதந்து சின்னகுத்தூசியின் உடல்நலனை அக்கறையுடன் விசாரித்தார். அதுமட்டுமின்றி, அமைச்சர்கள், தி.மு.கழக முன்னணியினரிடம் குத்தூசியின் எழுத்துப்பணியை பாராட்டிப் புகழ்ந்து புளகாங்கிதம் கொள்வார்.
திராவிடர் கழகத் தலைவர் கி.வீரமணி மற்றும் தி.மு.கழக மத்திய-மாநில அமைச்சர்கள் கழக முன்னணியினர் தொடர்ந்து மருத்துவமனைக்கு வருகை தந்து சின்னக்குத்தூசியின் உடல் நலத்தில் அக்கறை காட்டினர்.
நக்கீரன் குடும்பத்தினர், சின்னகுத்தூசியைப் பிதாமகனாகப் தந்தெடுத்துக்கொண்டதுடன், திரு.நக்கீரன் கோபால் அவர்கள் இரவு பகல் பார்க்காமல் கண்துஞ்சாமல்-ஒரு தந்தைககு மகன் என்னென்ன கடமைகளைச் செய்வாரோ அத்தனை கடமைகளையும் கடந்த 15 ஆண்டுகளாக செய்து வந்ததோடு, கடந்த ஓராண்டு காலம் பில்ராத் மருத்துவமனையில் அரண்மனை வைத்தியத்தை திரு.சின்னகுத்தூசிக்கு வழங்கினார்.
மறைந்த திரு.சின்னக்குத்தூசியின் உடல் இராயப்பேட்டை ஜானிஜான்கான் தெருவில் உள்ள நக்கீரன் பத்திரிகை அலுவலகத்தில் பொதுமக்கள் பார்வைக்காக வைக்கப்பட்டது. தி.மு.க. கழகத் தலைவர் கலைஞர், பொருளாளர் மு.க.ஸ்டாலின் உள்பட அரசியல் தலைவர்கள், பொதுமக்கள் குடும்பம் குடும்பமாக வந்து மலரஞ்சலி செலுத்தினர்.
மே 22 மாலை 4 மணியளவில் மயிலாப்பூரில் அன்னாரது உடல் தகனம் செய்யப்பட்டது.
சின்னகுத்தூசியின் வாழ்க்கை நிகழ்வுகள் வருமாறு:
சின்னக்குத்தூசி என்றழைக்கப்படும் இரா.தியாகராஜன் அவர்கள் 15.06.1934ல் திருவாரூரில் பிறந்தார். தந்தை ராமநாதன். தாயார் கமலா அம்மையார். திருவாரூர் கழக உயர்நிலைப் பள்ளியில் கல்வி பயின்ற சின்னக்குத்தூசி, பள்ளியில் படிக்கும்போதே திருவாரூர் நகர திராவிட இயக்க முன்னோடிகளான சிங்கராயர், முத்துக்கிருஷ்ணன், வி.எஸ்.பி. யாகூப், 'தண்டவாளம்' ரங்கராஜன் ஆகியோருடன் ஏற்பட்ட தொடர்பால் திராவிட இயக்க கொள்கைகளின்பால் கவரப்பட்டார்.
பள்ளிப்படிப்பு முடிந்தபின், பயிற்சி பெறாத ஆசிரியராக பணியாற்றிய சின்னகுத்தூசி (எ) இரா.தியாகராஜன், ஆகிரியர் பயிற்சி பெறுவதற்காக, திருவாரூர் நகர மன்றத் தலைவராக இருந்த சாம்பசிவம் அவர்களிடம் பரிந்துரைக் கடிதம் பெற்று தந்தை பெரியாரை சந்தித்தார். பெரியாரின் ஆசிரியர் பயிற்சி நிறுவனத்தில் சிறப்பு அனுமதியின் அடிப்படையில் சேர்க்கப்பட்டு, ஆசிரியர் பயிற்சி பெற்றார். அதன்பின், பல்வேறு பள்ளிகளில் ஆசிரியராகப் பணியாற்றினார். இவற்றில் குறிப்பிடத்தக்கது, குன்றக்குடி அடிகளார் அவர்களின் நிர்வாகத்தில் செயல்பட்ட குன்றக்குடி உயர்நிலைப்பள்ளியாகும். இப்பள்ளியில் பணியாற்றும்போது, குன்றக்குடி அடிகளாரின் அன்பைப் பெற்று, அவரிடம் நெருக்கமாக செயலாற்றினார்.
குன்றக்குடியில் பணியாற்றியகாலத்தில், தமிழ்த் தேசியக் கட்சியின் நிறுவனர் ஈ.வி.கி.சம்பத் அவர்களின் அழைப்பை ஏற்று, ஆசிரியர் பணியைத் துறந்துவிட்டு சென்னையில் நடந்த இந்தி எதிர்ப்பு போரில் பங்கேற்று சிறை சென்றார்.
திருவாரூரிலிருந்து வெளியான மாதவி வார இதழின் பொறுப்பாசிரியராகப் பணியாற்றிய சின்னக்குத்தூசி, பின்னர் தமிழ்த் தேசியக் கட்சியின் அதிகாரப் பூர்வ ஏடான தமிழ்ச் செய்தி வார இதழ், நாளிதழ் ஆகியவற்றின் பொறுப்பாசிரியராகவும் பணியாற்றினார். தமிழ்த் தேசியக் கட்சி, காங்கிரசில் இணைந்தபிறகு, பெருந்தலைவர் காமராஜர் அவர்கள் நடத்திய 'நவசக்தி'யில் தலையங்க ஆசிரியராக சிறிது காலம் பொறுப்பேற்றிருந்தார்.
நாத்திகம், அலைஓசை, எதிரொலி, முரசொலி உள்ளிட்ட நாளேடுகளிலும் நக்கீரன், ஜூனியர் விகடன் உள்ளிட்ட வாரமிருமுறை இதழ்களிலும் மற்றும் பல இதழ்கள், சிற்றிதழ்கள் ஆகியவற்றிலும் ஏராளமான அரசியல் விமர்சனக் கட்டுரைகளை எழுதிக் குவித்துள்ளார். வலுவான வாதங்கள், அசைக்க முடியாத ஆதாரங்கள், மறுக்க இயலாத புள்ளிவிவரங்கள், வரலாற்று நிகழ்வுகள் இவற்றை அடிப்படையாகக் கொண்டு எழுதப்படும் இவரது கட்டுரைகள் தமிழக அரசியல் களத்தில் பலரது கவனிப்பையும் பெற்றுவருகின்றன.
இவரது கட்டுரைகள் 'புதையல்', 'கருவூலம்', 'களஞ்சியம்', 'சுரங்கம்', 'பெட்டகம்', 'எத்தனை மனிதர்கள்', 'சங்கொலி', 'முத்தாரம்' 'வைரமாலை' உள்ளிட்ட பல தலைப்புகளில் நூல்களாக வெளிவந்துள்ளன. அமரர் ஜீவாவின் பொறுப்பில் வெளியான 'தாமரை' இதழிலும் இவரது சிறுகதைகள் வெளியாகியுள்ளன. நாராண துரைக்கண்ணன் அவர்கள் நடத்திய பிரசண்ட விகடன் இதழில் தொடர்கதை எழுதியுள்ளார். கலைஞர் அவர்களின் அன்பைப் பெற்ற சின்னக்குத்தூசி அவர்கள் முரசொலியில் தொடர்ந்து கட்டுரைகள் எழுதிவந்தார்.
சின்னக்குத்தூசி என்ற புனைபெயரில் இவர் பரவலாக அறியப்பட்டாலும் கொக்கிரகுளம் சுல்தான் முகமது, காமராஜ் நகர் ஜான் ஆசிர்வாதம், தெரிந்தார்க்கினியன், ஆர்.ஓ.மஜாட்டோ, திட்டக்குடி அனீஃப் ஆகிய புனைப் பெயரிகளிலும் பல அரசியல் விமர்சனக் கட்டுரைகளை எழுதியுள்ளார்.
நடமாடும் திராவிட இயக்க களஞ்சியம் எனும்படி தமிழகத்தின் 60 ஆண்டுகால அரசியல் விவரங்களை விரல் நுனியில் வைத்திருக்கும் சின்னக்குத்தூசி அவர்கள் இந்திய அரசியல் குறித்தும் ஆழ்ந்த அறிவனுபவம் மிக்கவர். பொதுவாழ்க்கை - எழுத்துப்பணி இவற்றிற்றகாக திருமணம் செய்துக்கொள்ளாமல் வாழ்ந்து வந்த சின்னக்குத்தூசி அவர்கள் சென்னை திருவல்லிக்கேணி எண்.13 வல்லப அக்கிரஹாரம் தெருவில் தங்கியிருந்த சிறிய அறை, இன்றைய பத்திரிகையாளர்களின் வேடந்தாங்கலாக அமைந்திருந்தது. மனிதநேயம், பகத்தறிவு, சுயமரியாதை ஆகியவற்றை இலட்சியங்களாகக் கொண்டு திராவிட இயக்க நெறிகளின்படி வாழ்ந்து வந்தவர் திரு.சின்னக்குத்தூசி (எ) இரா.தியாகராஜன் அவர்கள்.
சின்னக்குத்தூரி மரணம் - ராமதாஸ் இரங்கல் :
திரு,சின்னக்குத்துர்சி(எ) இரா.தியாரகராஜன் அவர்கள் மறைவையொட்டி பாமக நிறுவனர் ராமதாஸ் வெளியிட்டுள்ள இரங்கல் செய்தியில்,
முதுபெரும் பத்திரிகையாளரும் அரசியல் விமர்சகருமான சின்னக்குத்தூசி உடல்நலம் பாதிக்கப்பட்டு மருத்துவமனையில் மருத்துவம் பெற்று வந்த நிலையில் காலமானார் என்ற செய்திகேட்டு மிகுந்த அதிர்ச்சியும் வருத்தமும் அடைந்தேன்.
சின்னக்குத்தூசி பத்திரிகை உலகில் பல்வேறு முத்திரைகளை பதித்தவர். அரசியல் விமர்சனக் கட்டுரைகள் எப்படி இருக்க வேண்டும் என்பதற்கு இலக்கணம் படைத்தவர். ஒரு பத்திரிகையாளர் பொதுவாழ்வில் எப்படி இருக்க வேண்டும் என்பதற்கு முன்னுராதரணமாய் திகழ்ந்தவர். திமுக தலைவர் கலைஞருக்கு உற்ற துணையாய் இருந்தவர்.
அவரது திடீர் மறைவு கலைஞர் அவர்களுக்கும், பத்திரிகை உலகிற்கும் ஈடுசெய்ய முடியாத இழப்பாகும். அவரது மறைவால் வாடும் அனைவருக்கும் எனது ஆழ்ந்த இரங்கலை தெரிவித்துக்கொள்கிறேன். இவ்வாறு ராமதாஸ் தனது இரங்கல் செய்தியில் கூறியுள்ளார்.
சின்னக்குத்தூசி மறைவு - கி.வீரமணி இரங்கல் :
திரு,சின்னக்குத்துர்சி(எ) இரா.தியாரகராஜன் அவர்கள் மறைவையொட்டி திராவிடர் கழகத் தலைவர் கி.வீரமணி வெளியிட்டுள்ள இரங்கல் செய்தியில்,
மூத்தப் பத்திரிகையாளரும், திராவிட இயக்கச் சிந்தனையாளருமான திருவாரூர் இரா. தியாகராசன் (சின்னக்குத்தூசி வயது 80) அவர்கள் இன்று காலை மறைவுற்றார் என்ற தகவல் அறிந்து பெரிதும் வருந்துகிறோம். அக்கிராகாரத்து அதிசய மனிதர் இவரும்!
திருச்சி பெரியார் ஆசிரியர் பள்ளியின் தொடக்க முதல் ஆண்டில் படித்த மாணவர் இவர். சிறிது காலம் ஆசிரியர் பணியில் இருந்து, அதிலிருந்து விடுபட்டுப் பொதுப் பணியில் தன்னை முழுமையாக ஒப்படைத்துக் கொண்டவர்; திருமணம் செய்து கொள்ளவில்லை.
தோழர் ஈ.வெ.கி. சம்பத் அவர்களிடம், தனிச் செயலாளராகப் பணியாற்றி, அவர் மறைவுக்குப்பின் பத்திரிகைத் துறையில், எழுத்துத் துறையில் தம் கவனத்தைச் செலுத்தினார்.
“முரசொலி'யில் தமது கடைசி மூச்சு அடங்கும் வரை தன் எழுத்துப் பணி கடமையை ஆற்றினார். ‘எதிரொலி’ ஏட்டின் முழுப் பொறுப்பையும் ஏற்று அன்றாடம் பல புனைப் பெயர்களில் எழுதி மக்கள் மத்தியில் வலம் வந்தார்.
‘நக்கீரனில்’ அவர் எழுதிய கட்டுரைகள் நூல்களாக வெளி வந்துள்ளன. “உண்மை' இதழில் பல முக்கிய கட்டுரைகளைத் தொடர்ந்து எழுதி வந்திருக்கிறார்.
பழைய ஆதாரங்களைக் கொடுப்பதிலும், எந்தப் பிரச்சினையானாலும் அதன் முழுப் பரிமாணத்தை அப்படியே படிப்பவர்களின் மனக் கண் முன் கொண்டு வந்து நிறுத்துவதிலும் அவருக்கு நிகர் அவரே!
பழைய நூல்களைத் தேடிப் பிடித்து நம்மிடம் கொடுத்து அதுபற்றி எல்லாம் அளவளாவக் கூடியவர். நீண்டகாலமாக அவர் தங்கியிருந்த திருவல்லிக்கேணியில் உள்ள அறை நூல்களின், ஏடுகளின் அடைக்கலமாகவே இருக்கும்; அதற்குள் அவரும் இருந்தார் என்றுதான் சொல்ல வேண்டும்.
மாலை நேரங்களில் பத்திரிகையாளர்கள், செய்தியாளர்கள் அவரைச் சூழ்ந்து கொண்டே இருப்பார்கள். மாலை நேர அரசியல், பகுத்தறிவு, திராவிடர் இயக்க வகுப்பாகவே அது காட்சியளிக்கும்.
ஒரு முக்கியமான கால கட்டத்தில் அவரின் மறைவு தமிழ்நாட்டுக்கும், திராவிடர் இயக்கத்துக்கும் பேரிழப்பாகும்.
ஓராண்டு காலமாக உடல் நலம் பாதிக்கப்பட்டு, தனியார் மருத்துவமனையில் சிகிச்சை பெற்று வந்தார். சிகிச்சை பலனின்றி இன்று காலை மறைவுற்றார். பத்து நாள்களுக்குமுன்பு கலைஞர் அவர்களுடன் நேரில் சென்று அவரைப் பார்த்து உடல் நலம் விசாரித்து வந்தோம்.
அவர் பிரிவால் வருந்தும் முரசொலி, நக்கீரன் குழுமத்திற்கும், பத்திரிகையாளர்களுக்கும், எழுத்தாளர்களுக்கும் ஆறுதலையும், இரங்கலையும் தெரிவித்துக் கொள்கிறோம். நமக்கு நாமே ஆறுதலைச் சொல்லிக் கொள்ளும் நிலையில்தான் விடுதலை குழுமம் தனது வேதனைக் கண்ணீரைத் துடைத்துக் கொள்கிறது.
இவ்வாறு கி.வீரமணி தனது இரங்கல் செய்தியில் குறிப்பிட்டுள்ளார்.
சின்னக்குத்தூசி மறைவு - வைகோ இரங்கல் :
மூத்த பத்திரிகையாளர் சின்னக்குத்தூசியின் மறைவுக்கு மதிமுக பொதுச்செயலர் வைகோ இரங்கல் தெரிவித்துள்ளார்.
இதுகுறித்து அவர் வெளியிட்ட இரங்கல் செய்தி:
அரசியல் எழுத்து வித்தகர் சின்னகுத்தூசி மறைந்தார் என்ற செய்தி கேட்டு மிகுந்த அதிர்ச்சியும், தாங்க முடியாத மனவேதனையும் அடைந்தேன். மலைப்பாறையைப் பிளந்து அற்புதச் சிற்பம் வடிக்கும் சிற்றுளியைப் போல, கலை அழகு மிளிறும் சித்திரப் பூக்களை ஆடைகளில் தைத்திடும் குத்தூசியைப் போல, வாதப் பிரதிவாதங்களை நிரல்படுத்தி, எதிர்க்கருத்துக் கொண்டோரையும் திகைப்பில் ஆழ்த்தும் ஆய்வுக் கட்டுரைகளைத் தீட்டி வந்த சின்னகுத்தூசி எனும் எழுத்தாளர் தியாகராசன் அவர்கள், திராவிட இயக்கத்துக்கும் தமிழகப் பொது வாழ்வுக்கும் தன் எழுத்தால் ஆற்றி வந்த தொண்டு ஈடு இணையற்றது; மங்காப் புகழ் பெற்றது.
எந்தவொரு கருத்தை முன்வைத்தாலும் அழகிய தோரண வாயிலில் நுழைந்து, எழில்மிக்க மாளிகையில் உலவுவது போல, மணம் வீசும் நந்தவனத்தில் நடப்பது போல, வாசகர்களைத் தன்வயப்படுத்தும் தனித்துவமான ஆற்றல் சின்னகுத்தூசி அவர்களுக்கே உரியதாகும்.
அரசியல் நிகழ்வுகளை, நூறாண்டு காலப் பொதுவாழ்வுச் செய்திகளை, தந்தை பெரியார், அறிஞர் அண்ணா உள்ளிட்ட வரலாற்று நாயகர்களின் சிந்தனைகளை, கருத்துகளைப் பசுமரத்து ஆணிபோல மனதில் பதிய வைக்கும் அந்த உன்னதப் பணியை அவர்போலச் செய்வதற்கு இனி எவர் இருக்கிறார்?
பொடா கைதியாக வேலூர் மத்திய சிறையில் நான் இருந்தபோது என்னைச் சந்தித்து, தந்தை பெரியார் தமிழ்த்தென்றல் திரு.வி.க. இருவர் குறித்த ஒரு நிகழ்ச்சியைச் சுட்டிக்காட்டி என்னை நெஞ்சாரப் பாராட்டியதை எப்படி மறப்பேன்?
மறுமலர்ச்சி நடைப்பயணத்தின் நிறைவுநாளில் கைது செய்யப்பட்டு சிந்தாதிரிப்பேட்டை காவல் நிலையத்தில் நான் இருந்தபோது, என்னை ஆரத்தழுவி உதிர்த்த அமுதச் சொற்களை எப்படி மறப்பேன்?
முன்பு உடல்நலம் கெட்டு அவர் சிகிச்சை பெற்றபோது அவரைச் சந்தித்தேன். அவருக்கு உடல்நலக் குறைவு என்று அறிந்தபோது சென்னை சென்றவுடன் பார்க்க அவாவுற்றேன்.
அவர் விமர்சித்தால்கூட அந்த எழுத்தில் ஒரு சுகம் இருக்கும். மிக மிக எளிமையானவர். தன்னலமற்ற கொள்கையாளர்.
அவரது மறைவு திராவிட இயக்கத்திற்கும், தமிழக எழுத்து உலகத்திற்கும் ஈடு செய்யவே முடியாத பேரிழப்பு ஆகும்.
அவருக்கு துக்கம் நிறைந்த கண்ணீர் அஞ்சலியைச் செலுத்துகிறேன்.
இவ்வாறு வைகோ தனது இரங்கல் செய்தியில் குறிப்பிட்டுள்ளார்.
நீ அணிந்திருந்தது
வெள்ளை வண்ணத்தில்
ஒரு கறுப்புச் சட்டை
நீ அக்கிரகாரத்தில் பிறந்த
பெரியார் திடல்
திருமணமே செய்துகொள்ளாத
உனக்குத்
தமிழகத்திலேயே பெரிய குடும்பம்
உன் பேனா
உரிமம் இல்லாமல்
நீ வைத்திருந்த ஆயுதம்
கலைஞர் உனக்கு
இரங்கற்பா எழுதவேண்டும்
என்பதற்காகவே
இறந்துபோனாயோ!
