அடித்தட்டு மக்களுக்கு பாடுபடும் அரசு தி,மு.க. அரசு என்று முதல்வர் கருணாநிதி கூறியுள்ளார்.
சிஎன்என் & ஐபிஎன் தொலைக்காட்சிக்கு முதல்வர் கருணாநிதி அளித்த பேட்டி வருமாறு:
இந்த தேர்தலில் தமிழ்நாட்டு வாக்காளர்கள் முன் திமுக என்ன கேள்விகளை முன்வைக்கிறது?
திமுக அரசு 1967 முதல் இதுவரையில் ஆற்றியுள்ள சாதனைகளில் உங்களுக்கு நம்பிக்கை இருக்கிறதா, இல்லையா? நாங்கள் நம்பகமானவர்கள் என்பதை நீங்கள் புரிந்து கொண்டிருக்கிறீர்களா, இல்லையா? நாங்கள் அறிவித்த திட்டங்கள், வாக்குறுதிகள் ஆகியவற்றை நிறைவேற்றியிருக்கிறோமா, இல்லையா? அப்படி நிறைவேற்றக் கூடிய அளவுக்கு ஆற்றலும், அறிவும் அதே நேரத்தில் அக்கறையும் உள்ளவர்கள் நாங்கள் என்பதை நீங்கள் உணருகிறீர்களா, இல்லையா? ஏழை எளிய, அடித்தட்டு மக்களுக்கு பாடுபடுகின்ற அரசு இது என்பதை அறிந்திருக்கிறீர்களா, இல்லையா? இத்தகைய கேள்விகளைத் தான் வைக்க விரும்புகிறேன்.
2006 தேர்தல் அறிக்கையில் இலவசக் கலர் தொலைக்காட்சி பெட்டிகளை வழங்கினீர்கள். தற்போது லேப்டாப், கிரைண்டர் போன்றவைகளை அறிவித்திருக்கிறீர்கள். வெற்றி தோல்வியை நிர்ணயிப்பது இலவச சலுகைகளை அளிப்பதாக வாக்குறுதி கொடுப்பது தான் என்று கூறப்படுவதைப் பற்றி உங்கள் கருத்து என்ன?
இலவச சலுகைகள் என்பது வாக்குகளைப் பெறுவதற்காக அல்ல. ஏழையெளிய மக்கள் தமிழகத்தில் ஏராளமாக இருக்கிறார்கள். அவர்களை வாழ வைக்க வேண்டும் என்ற குறிக்கோள் திமுக அரசுக்கு இன்று நேற்றல்ல; இந்த இயக்கத்தைத் தொடங்கியதே அந்த ஏழைகளை வாழவைப்பதற்காகத் தான். ஏழையின் சிரிப்பிலே இறைவனைக் காண்போம் என்பது தான் எங்கள் தலைவர் அண்ணா முழக்கம். அந்தச் சிரிப்பைக் காண்பதற்கான முயற்சிகளில் இந்த இலவசத் திட்டங்களும் ஒன்றாகும்.
தொகுதி ஒதுக்கீடு பேச்சுவார்த்தையில் காங்கிரசுக்கும் திமுகவிற்கும் கருத்து மாற்றங்கள் ஏற்பட்டன. தேர்தலுக்குப் பிறகும் இந்த கூட்டணி தொடரும் என்ற நம்பிக்கை இருக்கிறதா?
இந்திய அளவில் காங்கிரசும், தமிழ்நாட்டளவில் திமுகவும் பெரிய கட்சிகள் என்பதை நாங்கள் பரஸ்பரம் உணர்ந்தவர்கள். எங்களுக்கு ஒரு சில கொள்கைகள், லட்சியங்கள் இருக்கின் றன. அவைகளை நிறைவேற்றுவதற்காக எங்களுக்கு மத்திய அரசின் உதவி தேவைப்படுகிறது. உதாரணமாக தமிழைச் செம்மொழியாக ஆக்கும் திட்டம். சோனியா காந்தி தான் அந்தக் கோரிக்கையை நிறைவேற்றித் தர அவரே முன்னின்று முயற்சித்து, மறைந்த கல்வி அமைச்சர் அர்ஜூன்சிங் உதவியோடு தமிழுக்கு செம்மொழி அந்தஸ்து பெற்றுத் தந்தார்.
தமிழகத்திற்கு இன்னும் நிறைய வேண்டும் என்பதில் போராடுவதின் காரணமாக ஏற்படுகிற மாறுபாடுகள் இருக்கலாம். ஆனால் அடிப்படைக் கொள்கைகளில் எங்களுக்கும் அவர்களுக்கும் அதாவது மதவாதத்தை ஒழிப்பது, இந்தியாவில் சமதர்ம சமுதாயத்தை உருவாக்குவது போன்றவற்றில் நாங்கள் இருவரும் மாறுபட்டவர்கள் அல்ல.
திமுக இதுவரை இல்லாத அளவிற்கு குறைந்த இடங்களில் போட்டியிடுகிறது. கூட்டணி ஆட்சி அமையப் போகிறது என்பதற்கான முன் அறிவிப்பாக எடுத்துக் கொள்ளலாமா?
ஒரே கட்சியின் ஆட்சியா அல்லது கூட்டணி ஆட்சியா என்பதை தேர்தல் முடிந்த பிறகுதான் சொல்ல முடியும். மேற்கு வங்கத்தில்கூட மார்க்சிஸ்ட் கட்சி ஆளுங்கட்சியாக இருந்தாலும், தேர்தல் முடிவு வருவதற்கு முன்பே கூட்டணி அமைத்து, தேர்தல் முடிந்த பிறகு உகந்தவாறு அரசு அமைக்கிறார்கள். அதைப்போல நான் நம்புகிறேன். தமிழ்நாட்டு மக்களும் மற்றவர்களும் ஒரே கட்சியின் ஆட்சி நீடிக்க வேண்டுமென்று தான் கருதுவார்கள் என்று எண்ணுகிறேன். ஒருவேளை
ஸ்ஷீtவீஸீரீ ஜீணீttமீக்ஷீஸீ
என்று சொல்வார்களே, அதிலே மாற்றம் ஏற்பட்டு கூட்டணி ஆட்சி அமைந்தால் தான் ஒரு அரசு நிலைத்திருக்க முடியும் என்ற சூழ்நிலை தோன்றினால், நாங்கள் அப்போது மற்றக் கட்சிகளோடு கலந்து பேசி அதைத் தீர்மானிப்போம்.
துணை முதல்வர் மு.க. ஸ்டாலின் தான் உங்களுடைய அரசியல் வாரிசு என்பதில் ஏதாவது கேள்விக்குறி இருக்கிறதா?
எந்தக் கேள்விக்குறிக்கும் இடம் இல்லாமல் வளர்ந்தவன்தான் மு.க.ஸ்டாலின். நான் அரசியலில் நுழைந்து அண்ணா தலைமையில் முக்கிய பொறுப்பை ஏற்றுக் கொள்பவனாக இருந்து பொருளாளராக அண்ணாவால் தேர்ந்தெடுக்கப்பட்டு, அந்தப் பொறுப்பை நான் எப்படி நிறைவேற்றினேனோ அதற்கு அண்ணா காட்டிய அன்பும் என்னிடம் அவர்கள் வைத்த நம்பிக்கையும், அதற்குக் கொஞ்சமும் குந்தகம் இல்லாமல் எப்படி நான் நடந்து கொண்டேனோ அதைப் போலவே என்னுடைய தலைமையில் மு.க. ஸ்டாலின் தொண்டாற்றி வருகிறார். என்னிடத்தில் நம்பிக்கை வைத்திருக்கின்ற திமுக தோழர்கள், கட்சியில் இருக்கிற முன்னணியினர், பொதுக்குழு உறுப்பினர்கள் எல்லாம் மு.க. ஸ்டாலினிடமும் நம்பிக்கை வைத்திருக்கிறார்கள். எனவே அது கேள்விக்குறியாக ஆவதற்கு எந்தவித நியாயமும் இல்லை.
அரசியலில் உங்கள் குடும்பத்தினரை நீங்கள் முன்னிலைப்படுத்துகிறீர்கள் என்ற குற்றச்சாட்டிற்கு உங்கள் பதில் என்ன?
திமுக ஒரு ஜனநாயக இயக்கம். அடுத்தது யார் என்ற கேள்விக்கு நாமே ஒருவரைப் பிடித்து வைத்து, இவர் தான் அடுத்தது என்று சொல்லக்கூடிய இயக்கம் அல்ல இது. அதாவது மடாதிபதிகள் நடத்துகின்ற மடம் அல்ல. உதாரணம் சொல்ல வேண்டு மேயானால் சங்கர மடம் இருக்கிறது அல்லவா, அந்த மடத்திலே பெரியவர் சங்கராச்சாரியார் இருந்து, தனக்குப் பின்னர் இவர்தான் என்று ஒருவரை அடையாளம் காட்டி விட்டுச் சென்றார்.
அதை அந்த மடத்தைச் சேர்ந்தவர்கள் எல்லோரும் ஏற்றுக் கொண்டார்கள். அதைப் போல திமுக ஒரு மத ஸ்தாபனம் அல்ல. இது ஜனநாயக ரீதியான ஸ்தாபனம். ஜனநாயகத்தில் தலைவர்களை எப்படித் தேர்ந்தெடுக்கிறார்களோ அதைப்போல தான் இயக்கத் தோழர்கள், செயலாளர்கள் எல்லாம் சேர்ந்து இவர் இந்தப் பொறுப்பு வகிக்க தகுதியானவர் என்று கருதினால் அவர்கள் தேர்ந்தெடுப்பார்கள்.
உங்கள் குடும்பத்தை ஊக்குவிக்கிறீர்கள் என்ற குற்றச்சாட்டு பற்றி?
எனக்குக் குடும்பம் இருப்பதால் பெரிய தொல்லை. என்னைப் புரிந்தவர்கள் குடும்ப அரசியல் நடத்துகிறேனா இல்லையா என்பதை எண்ணிப் பார்க்க வேண்டும். குடும்பம் நடத்துவது என்றால் திருமணமாகி ஆணும், பெண்ணும் சேர்ந்து அவர்களுக்குப் பிறக்கின்ற பிள்ளைகள், அண்ணன், தம்பி இவர்கள் தான் குடும்பம் என்று அர்த்தம் அல்ல. துணைக்கு யார் யாரோ சேர்ந்து கொண்டு சில குடும்பங்கள் உருவாகின்றன. நான் அப்படிப்பட்ட குடும்பத்தைச் சேர்ந்தவன் அல்ல. ஒரு நேர்மையான குடும்பத்தைச் சேர்ந்தவன்.
கடைசியாக ஒரு கேள்வி. கிரிக்கெட் அரை இறுதி போட்டியில் இந்தியாவும் பாகிஸ்தானும் விளையாடப் போகின்றன. நீங்கள் ஒரு கிரிக்கெட் ரசிகர் என்ற முறையில் இந்திய வீரர்களுக்கு என்ன சொல்கிறீர்கள்?
ஒற்றுமையாக இருந்து அவரவர்களுக்கென்று ஒதுக்கப்பட்ட இடங்களில் இருந்து உற்சாகமூட்டு கின்ற முறையில் பொறுப்போடு விளையாடி இந்தியாவிற்கு பெருமை சேர்க்க வேண்டும் என்பது தான் நான் அவர்களுக்கு தருகின்ற வாழ்த்து.
இவ்வாறு கருணாநிதி கூறினார்.
