108 சேவையை விரிவுப்படுத்த கலைஞர் உத்தரவு

அவசரகால மருத்துவ ஊர்தி 108 சேவைத் திட்டத்தினை, தேவைப்படும் இடங்களுக்கு விரிவுபடுத்திடும் வகையில் கூடுதலாக 200 ஊர்திகளை விரைந்து கொள்முதல் செய்து, இத்திட்டப் பணிகள் மேலும் செம்மையாக நடைபெற ஆவன செய்திட வேண்டுமென்று முதல்வர் கருணாநிதி உத்தரவிட்டுள்ளார்.

மக்கள் நல்வாழ்வு மற்றும் குடும்பநலத் துறையின் திட்டங்கள் குறித்து முதல்வர் கருணாநிதி நேற்று ஆய்வு செய்தார். வருமுன் காப்போம் திட்டத்தின்கீழ் நடைபெற்று வரும் மருத்துவ முகாம்கள் குறித்து ஆய்வு செய்த முதல்வர் கருணாநிதி, மருத்துவ முகாம்களை அதிக அளவில் நடத்தி, கலைஞர் காப்பீட்டுத் திட்டத்தில் பலரும் பயனடைய நடவடிக்கைகள் மேற்கொள்ளப்பட வேண்டும் என்றும், இத்திட்டம் பற்றிய விழிப்புணர்வை மக்களிடையே மேலும் வளர்த்திட வேண்டும் என்றும் அறிவுறுத்தினார்.

அவசரகால மருத்துவ ஊர்தி 108 சேவைத் திட்டத்தினை, தேவைப்படும் இடங்களுக்கு விரிவுபடுத்திடும் வகையில் கூடுதலாக 200 ஊர்திகளை விரைந்து கொள்முதல் செய்து, இத்திட்டப் பணிகள் மேலும் செம்மையாக நடைபெற ஆவன செய்திட வேண்டுமென்றும்;

கர்ப்பிணி பெண்களுக்கு வழங்கப்படும் மகப்பேறு நிதி உதவி உரிய காலத்தில் பயனாளிகளுக்கு கிடைக்க வேண்டும். போலி மற்றும் காலாவதி மருந்து விற்பனை அறவே ஒழிக்கப்பட வேண்டும். இத்தகைய செயலில் ஈடுபடுவோர் மீது கடுமையான நடவடிக்கை எடுக்க வேண்டும். உணவு கலப்படம் தடுக்க உரிய நடவடிக்கை எடுக்க வேண்டும். கலப்பட உணவுகளை கண்டுபிடித்து அழிக்க வேண்டும். அரசு மருத்துவமனைகளில் போதிய மருந்துகள் இருப்பில் உள்ளதா என்று அடிக்கடி கண்காணிக்க வேண்டும். இருப்பை உறுதி செய்ய வேண்டும். மருந்து இல்லை என்ற நிலை ஏற்படக் கூடாது.

மருத்துவமனைகளுக்கு புதிய மருத்துவ சாதனங்களை உடனடியாக கொள்முதல் செய்ய வேண்டும். அரசு மருத்துவமனை, ஆரம்ப சுகாதார நிலையங்களில் மருத்துவம், மருத்துவம் சார்ந்த பணியிடங்களை உடனுக்குடன் நிரப்ப வேண்டும். நகர சுகாதார மையங்களை தாமதமின்றி ஏற்படுத்த வேண்டும். நகரத்தில் உள்ள குடிசை வாழ் மக்களுக்கு சுகாதார வசதி கிடைக்க செய்ய வேண்டும்.

மாநில அளவில் சிறப்பு ஆய்வுக் குழு அமைத்து, அனைத்து மருத்துவமனைகளையும் அவ்வப்போது ஆய்வு செய்ய வேண்டும். மலேரியா, டெங்கு போன்ற காய்ச்சலை கட்டுப்படுத்த நடவடிக்கை எடுக்க வேண்டும்.

கொசு ஒழிப்புக்கு சிறப்பு நடவடிக்கை எடுக்க வேண்டும் இந்த ஆண்டு திட்ட ஒதுக்கீட்டில் இதுவரை 40 சதவீதத்திற்கும் அதிகமாக திட்டப் பணிகள் நடந்துள்ளன என்றும்

பன்றிக் காய்ச்சல் காரணமாக உயிரிழப்புகள் ஏற்படுவதை முற்றிலும் தடுத்திட உரிய தடுப்பு நடவடிக்கைகளை மாநிலம் முழுவதிலும் விரைந்து மேற்கொள்ளுமாறும்; பள்ளிச் சிறார் கண்ணொளி காப்போம் திட்டம் கடந்த ஆண்டு செயல்படுத்தப்பட்டதைப் போன்று இந்த ஆண்டிலும் செம்மையாகச் செயல்படுத்தி, தேவைப்படும் மாணவ மாணவியர்க்குக் கண் கண்ணாடிகளை உடனடியாக வழங்கிட வேண்டுமென்றும் அதிகாரிகளுக்கு முதல்வர் கருணாநிதி அறிவுறுத்தினார்.

இந்த ஆய்வின்போது, மக்கள் நல்வாழ்வுத்துறை அமைச்சர் எம்.ஆர்.கே. பன்னீர்செல்வம், தலைமைச் செயலாளர் எஸ்.மாலதி, மக்கள் நல்வாழ்வு மற்றும் குடும்ப நலத்துறை முதன்மைச் செயலாளர் வி.கே.சுப்புராஜ், நிதித்துறை முதன் மைச் செயலாளர் கே. சண்முகம் மற்றும் உயர் அலுவலர்கள் உடன் இருந்தனர்.