திமுக கூட்டணிக்கு தேசியவாத காங்கிரஸ் கட்சி ஆதரவு

சரத்பவார் தலைமையில் இயங்கி வரும் தேசியவாத காங்கிரஸ் கட்சியின் பொதுச்செயலாளர் டாக்டர் ராஜேசுவரன் நிருபர்களுக்கு பேட்டி அளித்தார்.

அப்போது அவர், ‘’ஐக்கிய முற்போக்கு கூட்டணியில் தி.மு.க.வும், தேசியவாத காங்கிரசும் முக்கிய அங்கம் வகிக்கின்றன.

அந்த அடிப்படையில் இரு கட்சிகளும் நல்ல தோழமை உணர்வுடன் உள்ளன. எனவே இந்த சட்டசபை தேர்தலில் தேசியவாத காங்கிரஸ் கட்சி, தி.மு.கழகத்தை ஆதரிக்க முடிவு செய்துள்ளது.

தி.மு.க.வின் வெற்றிக்கு தேசியவாத காங்கிரஸ் கட்சித் தொண்டர்கள் பிரசாரம் செய்து பணியாற்றுவார்கள். தேசியவாத காங்கிரஸ் கட்சியின் இந்த முடிவு 16.03.2011 அன்று அதிகாரப்பூர்வமாக தி.மு.க.விடம் தெரிவிக்கப்படும்.

முதலமைச்சர் கருணாநிதியை தமிழக தேசியவாத காங்கிரஸ் கட்சி பொறுப்பாளராகிய நானும் (டாக்டர் ராஜேசுவரன்) மற்றும் மூத்த தலைவர்களும் சந்தித்து பேசுவோம்’’ என்று கூறினார்.

திமுக கூட்டணிக்கு அகில இந்திய பிற்படுத்தப்பட்டோர் பேரவை ஆதரவு :

திமுக கூட்டணிக்கு அகில இந்திய பிற்படுத்தப்பட்டோர் பேரவை ஆதரவு தெரிவித்துள்ளது.

அகில இந்திய பிற்படுத்தப்பட்டோர் பேரவை மாநில பொது செயலாளர் வீரவன்னியராஜா வெளியிட்டுள்ள அறிக்கை:

பிற்படுத்தப்பட்ட, மிகவும் பிற்படுத்தப்பட்ட மக்களுக்கு வேலைவாய்ப்பு, கல்வி, ஐஐடி, ஐஐஎம் போன்ற உயர் கல்வி நிறுவனங்களில் 27 சதவீத இட ஒதுக்கீடு கிடைக்க உதவியவர் முதல்வர் கருணாநிதி. அதற்காக இந்த தேர்தலில் திமுகவுக்கு ஆதரவளிக்க அகில இந்திய பிற்படுத்தப்பட்டோர் பேரவை முடிவு செய்துள்ளது, என்று கூறப்பட்டுள்ளது.