உதயசூரியன் பட்டனை அழுத்தினால் வீட்டில் கிரைண்டர், மிக்சி ஓடும்

உதய சூரியன் பட்டனை அழுத்தினால், உங்கள் வீட்டில் கிரைண்டனர், மிக்சி ஓடும் என்று மத்திய அமைச்சர் தயாநிதி மாறன் கூறினார்.

எழும்பூர் தொகுதி திமுக வேட்பாளர் பரிதி இளம்வழுதியை ஆதரித்து மத்திய ஜவுளித் துறை அமைச்சர் தயாநிதி மாறன் 27.03.2011 அன்று செனாய் நகர் பகுதியில் பிரசாரம் செய்தார்.

தயாநிதி மாறன் பேசியதாவது:

எழும்பூர் தொகுதியில் 6வது முறையாக பரிதி இளம்வழுதியை முதல்வர் கருணாநிதி நிறுத்தியிருக்கிறார் என்றால் என்றென்றும் அவர் கருணாநிதியின் நம்பிக்கைக்கு உரியவராக உள்ளார். தனி ஒருவராக சட்டப்பேரவைக்கு சென்ற போது கூட அதிமுகவுக்கு பாடம் புகட்டியவர். இதனால் அடிக்கடி ஜெயலலிதாவால் சிறைக்கு அனுப்பப்பட்டுள்ளார். சற்றும் தயங்காமல் உங்கள் வாக்குகளை அளித்து அவரை மீண்டும் சட்டப்பேரவைக்கு அனுப்ப வேண்டும். கடந்த 5 ஆண்டுகளில் முதல்வர் கருணாநிதி எத்தனையோ நலத்திட்டங்களை செய்துள்ளார்.

சென்னையை பொறுத்தவரை தடுக்கி விழுந்தால் கூட மேம்பாலங்கள் தான் உள்ளது. நாம் கட்டியதை கூட நோண்டி பார்த்து குற்றம் கண்டுபிடிக்க முயற்சி எடுத்தார் ஜெயலலிதா. ஆனால் முடியவில்லை. போக்குவரத்து நெரிசலை குறைக்க சென்னையில் பல பாலங்கள் கட்டப்பட்டு வருகிறது. அதேபோன்று சென்னையில் இட நெருக்கடியை குறைக்க புதிய நகரை உருவாக்குவோம் என்று முதல்வர் கருணாநிதி தேர்தல் அறிக்கையில் கூறியுள்ளார். அண்ணாநகர், கே.கே.நகர், அயன்புரம், மறைமலை நகர், எம்ஜிஆர் நகரை உருவாக்கியவர் முதல்வர் கருணாநிதி. சென்னையை பற்றி கவலைப்படுபவர் அவர். மீண்டும் பெரிய நகர் உருவாக்கப்படும். அதில் குறைந்த செலவில் நீங்கள் சொந்த வீடுகள் கட்டும் நிலை வரும்.

மெட்ரோ ரயில் திட்டத்தை கொண்டு வந்தோம். அதை தொடங்கி வைக்க போவதும் முதல்வர் கருணாநிதி தான். அவர் தந்த ஒரு ரூபாய்க்கு ஒரு கிலோ அரிசி, இலவச கலர் டிவி, கேஸ் அடுப்பு உங்கள் வீட்டில் உள்ளது. கலைஞர் காப்பீட்டு திட்டத்தை பொறுத்தவரை உங்கள் வீட்டில் யாராவது ஒருவராவது பயன்பெற்றிருப்பார்கள். மே. 14 முதல் மாதத்துக்கு ஒரு முறை 35கிலோ அரிசி இலவசமாக தருவார். டிவி கொடுத்த முதல்வர் கருணாநிதி மிக்சி, கிரைண்டரும் தருவார். இன்னும் அதிகமாக கேட்பீர்களானால் பிரிட்ஜ், வாஷிங் மெஷினும் தருவார். ஒரு தந்தை தான் பெற்ற மகளுக்கு செய்ய வேண்டிய சீதனத்தை முதல்வர் கருணாநிதி வாரி வழங்குவார். இதை எல்லாம் பெற ஏப்ரல் 13ம்தேதி வாக்குப்பதிவு எந்திரத்தில் நீலநிற பொத்தானை அழுத்துங்கள். உங்கள் வீட்டில் மிக்சி, கிரைண்டர் எல்லாம் ஓடும். மாணவர்கள் கையில் லேப் டாப் இருக்கும்.

இவ்வாறு தயாநிதிமாறன் பேசினார்.

அவருடன் வேட்பாளர் பரிதி இளம்வழுதி, பகுதிச் செயலாளர் ஏகப்பன், கவுன்சிலர் கோவிந்தன், வட்டச் செயலாளர் பாஸ்கர், நிர்வாகிகள் அப்பன்துரை, எம்.மணி, காங்கிரஸ் வட்டத் தலைவர் பக்தவச்சலம், ஏழுமலை, அசோக், சுரேந்திரன், டி.தயாநிதி ஆகியோர் உடன் சென்றனர்.

ஜெயலலிதாவுக்கு நன்மை செய்யும் மனசு வராது: குஷ்பு

தமிழக மக்களுக்கு ஜெயலலிதா எதுவுமே செய்யவில்லை. ஏனெனில் அவர்களுக்கு செய்ய மனசு வராது என, நடிகை குஷ்பு பேசினார்.

திண்டுக்கல் மாவட்டம் நத்தம் தொகுதியில் போட்டியிடும் தி.மு.க. வேட்பாளர் க.விஜயனை ஆதரித்து நத்தம், கோபால்பட்டி, சாணார்பட்டி, கொசவப்பட்டி ஆகிய இடங்களில் திரண்டிருந்த மக்கள் மத்தியில் நடிகை குஷ்பு பேசினார். அவர் கூறியதாவது:

தி.மு.க. தொண்டராக இங்கே வந்திருப்பதில் ரொம்ப மகிழ்ச்சி அடைகிறேன். உங்கள் ஊரின் மகளாக வந்திருக்கிறேன். தமிழகத்தில் சில இடங்களில் மின்தடை ஏற்பட்டு வருகிறது.

இந்த மின்தடைக்கு தி.மு.க.வோ, கலைஞரோ காரணம் கிடையாது. மின்தடை ஏற்படுவதற்கு ஜெயலலிதாவும், அந்த துறை அமைச்சராக இருந்த இந்த தொகுதி எம்.எல்.ஏ.வான விசுவநாதனும் தான் காரணம். கடந்த 2001ம் ஆண்டு முதல் 2006ம் ஆண்டு வரை மின் உற்பத்தி திட்டங்கள் மேற்கொள்ளவில்லை.

தமிழக மக்களுக்கு ஜெயலலிதா எதுவுமே செய்யவில்லை. ஏனெனில் அவர்களுக்கு செய்ய மனசு வராது. மக்களுக்கு நன்மை செய்யும் மனசு தலைவருக்கு தான் உண்டு. மக்களை பற்றியே அவர் சிந்தித்து கொண்டிருக்கிறார். தனது 12 வயது முதல் 87 வயது வரை 75 ஆண்டு காலம் அவர் அயராது உழைத்து வருகிறார்.

மழையிலும், வெயிலிலும் மக்கள் கஷ்டப்படக்கூடாது என்பதற்காக கலைஞர் வீடு வழங்கும் திட்டம் தொடங்கினார். மீண்டும் வெற்றி பெற்றால், இந்த திட்டத்தின் கீழ் வீடு கட்ட ரூ.1 லட்சமாக உயர்த்தி வழங்கப்படும் என்று தெரிவித்து இருக்கிறார்.

இதேபோல் பெண்களுக்கு எண்ணற்ற திட்டங்களை அவர் நிறைவேற்றி இருக்கிறார். கர்ப்பிணி பெண்களுக்கான நிதியுதவி, மகளிர் சுய உதவிக்குழுக்களுக்கு கடன் தொகை ஆகியவற்றை உயர்த்தியும், கிரைண்டர், மிக்சி ஆகியவற்றை வழங்கவும் இருக்கிறார். சொன்னதை மட்டும் செய்யாமல், சொல்லாததையும் அவர் செய்திருக்கிறார். குளிர்சாதன பெட்டி, வாசிங் மிஷனும் பெண்களுக்கு வழங்கப்படும் என்று துணை முதல் அமைச்சர் மு.க.ஸ்டாலின் தெரிவித்து இருக்கிறார்.

வருகிற தேர்தலில் ஜெயலலிதா ஜெயிக்கப்போவது இல்லை. அவர் வெற்றி பெற்றால் வறுமைக்கோட்டுக்கு கீழே உள்ள குடும்பத்துக்கு 4 ஆடுகள், 2 மாடுகள் கொடுப்பதாக சொல்லி இருக்கிறார். தமிழகத்தில் 30 லட்சம் குடும்பத்தினர் வறுமைக்கோட்டுக்கு கீழே உள்ளனர். இவர்களுக்கு கொடுப்பதற்கு சுமார் 11/4 கோடி ஆடுகளும், 60 லட்சம் மாடுகளும் தேவையாக உள்ளது.

இந்தியா முழுவதிலும் இந்த எண்ணிக்கையில் ஆடு, மாடுகள் இல்லை. மேஜிக் மூலமாக தான் ஆடு, மாடுகளை அவர் கொண்டு வருவார். தி.மு.க. தேர்தல் அறிக்கையின் ஜெராக்ஸ் காப்பியாக, அ.தி.மு.க.வின் தேர்தல் அறிக்கை உள்ளது. இதை நம்பி மக்கள் ஏமாற வேண்டாம்.

தமிழக மக்கள் முன்னேற வேண்டும், தமிழகத்தில் அடுத்த தலைமுறையினர் டாக்டர், என்ஜினீயர் ஆக வேண்டும் என்பதற்காகவும் கிராமங்களில் பள்ளிகளையும், மாவட்டந்தோறும் கல்லூரிகளையும் கலைஞர் திறந்து வருகிறார்.

ஆனால் மக்களை படிக்க விடக்கூடாது, சுயமாக சிந்திக்கக்கூடாது என்பதற்காக ஆடு, மாடுகளை தருவதாக ஜெயலலிதா கூறுகிறார். திட்டங்களை சொல்லி நாங்கள் ஓட்டு கேட்கிறோம். ஆனால் திட்டி, திட்டி அந்த அம்மா ஓட்டு கேட்கிறார். மக்கள் அவரை நம்ப தயாராக இல்லை.

6வது முறையாக தலைவர் முதல் அமைச்சரானால், இந்தியாவில் மட்டுமல்லாமல், ஆசியாவிலேயே மிகப்பெரிய சாதனையாக அமையும். அந்த பெருமை நமக்கு கிடைக்க வேண்டும்.

இவ்வாறு நடிகை குஷ்பு பேசினார்.

என்னிடத்தில் பட்டம் பெற்று என்னை எதிர்க்கிறார்கள் : கலைஞர்

முதலமைச்சர் கருணாநிதி எழுதிய பொன்னர்-சங்கர் என்ற நாவல் அதே பெயரில் படமாகி இருக்கிறது. கதை-திரைக்கதை வசனத்தை முதலமைச்சர் கருணாநிதி எழுதி, நடிகர் தியாகராஜன் டைரக்டு செய்திருக்கிறார். பிரசாந்த் இரட்டை வேடங்களில் நடித்து இருக்கிறார்.

இந்த படத்தின் பாடல்கள் வெளியீட்டு விழா 27.03.2011 அன்று சென்னை சாலிகிராமத்தில் உள்ள பிரசாத் லேப் ஸ்டூடியோவில் நடந்தது. பாடல்களை முதலமைச்சர் கருணாநிதி வெளியிட, அதை தொழில் அதிபர் பொள்ளாச்சி மகாலிங்கம் பெற்றுக்கொண்டார். விழாவில் முதலமைச்சர் கருணாநிதி பேசும்போது,

’’எனக்கு இந்த நேரம் நாட்டில் என்ன வேலை என்றால் - எங்கேயாவது ஒரு ஊரில் மேடை அமைத்து - அந்த மேடையில் தி.மு.க. கூட்டணி கட்சியின் வேட்பாளர் யாரையாவது அறிமுகம் செய்து - அவர்களுக்கு வாக்களிக்க வேண்டு மென்று கேட்டுக் கொள்கிற பெரும் பணி. அந்தப் பணியை ஒத்தி வைத்து விட்டு இந்தப் பணிக்கு நான் வந்திருப்பதற்குக் காரணம் - இந்தப் பணியையும் நான் அந்தப் பணியைப் போலவே மதிப்பது தான்காரணம்.

பொதுவாக இப்போதெல்லாம் திரைப்பட விழாக்கள் - திரைப்பட இசை கேசட் வெளியீட்டு விழாக்கள் - திரைப்படத் தொடக்க விழாக்கள் போன்ற விழாக்களில் கலந்து கொள்ள எனக்கு ஒரு வகையிலே அச்சம்.

ஏனென்றால் அந்த விழா தொடர்ந்து திரை உலகத்திலே இருக்கின்றவர்களே கூட, அதை விமர்சிக்கின்ற வகையில் அந்த நிகழ்ச்சியை விமர்சித்தால் கூட பரவாயில்லை - அதை வைத்து என்னையே விமர்சிக்கின்ற வகையில் நிலைமை ஏற்பட்டிருக்கின்ற காரணத்தால் கூடுமான வரையில் அத்தகைய நிகழ்ச்சிகளை தவிர்ப்பதை நான் மிகுந்த அக்கறையோடு கையாண்டு வருகிறேன்.

இன்றைக்கு நாம் மிகுந்த மகிழ்ச்சியடையக் கூடிய அளவிற்கு - இந்தப் படத்தினைத் தயாரித்திருக்கிறார்கள். ஒரேயொரு வார்த்தையில் சொல்ல வேண்டுமென்றால் தியாகராஜனுடைய கைகளை எடுத்து முத்தமிட்டுக் கொள்ளலாம் - அந்த அளவிற்கு இந்தப் படத்தை இயக்கியிருக்கிறார். பிரசாந்தின் கன்னத்தில் அந்த முத்தத்தைத் தரலாம் - அந்த அளவிற்கு தம்பி பிரசாந்த் இரு வேடங்களில் இதிலே நடித்திருக்கிறார்.

இவைகளையெல்லாம் நான் பேசினால் இந்தப் படத்தினுடைய பாடல்களை - உரையாடல்களை - நடிப்பை - இசையை - இசையமைத்த நம்முடைய இசைஞானி அவர்களைப் பாராட்டினால் கருணாநிதி சினிமா உலகத்தை விட்டு என்றைக்கும் வெளியே வரமாட்டான் என்று எனக்கு ஜாதகம் கணிப்பார்கள். அது கணிக்கப்பட வேண்டிய ஜாதகம். அப்படித் தான் என்னுடைய ஜாதகம் கணிக்கப்பட வேண்டும். சினிமா உலகத்தை விட்டு - திரைப்படத் துறையை விட்டு - எழுத்துத் துறையை விட்டு கருணாநிதி வெளியே வர மாட்டான் என்று சொல்வதை விட ஒரு சிலாக்கியமான, நல்ல மதிப்புரை வேறு யாரும் எனக்குத் தர இயலாது.

ஏனென்றால் நான் அரசியல்வாதியாக இருந்தாலுங்கூட, இன்றைக்கு தமிழகத்தில் ஆட்சிப் பொறுப்பேற்றிருக்கின்ற முதல்-அமைச்சராக இருந்தாலுங்கூட, என்னுடைய எண்ணம் எல்லாம், என்னுடைய ஆர்வம் எல்லாம் எழுத வேண்டும் - எழுத வேண்டும் - எழுத வேண்டும் என்பதிலே தான். எழுத்தை மறந்து விட்டு - இந்தக் கலைத் துறையை விட்டு - இலக்கியத் துறையை விட்டு விட்டு - அரசியல் துறையிலே மாத்திரம் நாட்டம் செலுத்த வேண்டுமென்றால் அது என்னால் இயலாத காரியம். எனவே தான் அரசியல் துறையிலே ஈடுபட்டிருக்கின்ற இந்த நேரத்திலே கூட கலைத்துறைக்குத் தர வேண்டிய மதிப்பை அளிப்பதற்காக அழைத்தவுடன் ஏற்றுக் கொண்டு இன்று உங்களையெல்லாம் காணுகின்ற வாய்ப்பை நான் பெற்றிருக்கிறேன்.

பொதுவாக நான் இந்த விழாவிலே இதையெல்லாம் பேசுவது சரிதானா என்பது எனக்கே கூட - என் உள்ளத்தின் அடித்தளத்திலே எழுகின்ற வினாவாக இருந்தாலுங்கூட, பேசித் தான் தீர வேண்டும் என்பதில் நான் கொஞ்சம் அழுத்தந் திருத்தமாக இருக்கிறேன்.

நான் ஒரு பத்திரிகையைப் பார்த்தேன். ஒரு பெரியவர்(?) அரசியலிலே நானே கருதிக் கொள்கிறேன் - என்னை விட சிறந்தவராகவோ அல்லது என்னை விட திறமையானவராகவோ இருப்பவர் (?) என்று சிலரால் கருதப்படுபவர் - சொல்லியிருக்கிறார் - கருணாநிதி சினிமா துறையையும் தன்னுடைய வீட்டுப் பிள்ளைகளுக்கு பங்கு போட்டுக் கொண்டு அதிலும் கொள்ளை அடிக்கிறார் என்று!

சினிமா துறையில் என்னுடைய மகன் முத்து நடித்தான். அதற்குப் பிறகு என்னுடைய இன்னொரு மகன் தமிழரசு ஒரு படத்தைத் தயாரித்தான், அடுத்த படம் தயாராகிக் கொண்டிருக்கிறது.

ஆனால் நான் அந்த விமர்சகரைக் கேட்க விரும்புகிறேன். அந்த விமர்சகர் சொன்னதை வெளியிட்டு மகிழ்கின்ற பத்திரிகைக்காரர்களைக் கேட்க விரும்புகிறேன்.

என் குடும்பத்திலே மாத்திரம் தானா மூன்று நான்கு பேர் சினிமா துறையிலே இருக்கிறோம்? மன்னிக்க வேண்டும் - ஏ.வி.எம். குடும்பத்தினர்கள் - செட்டியார் யார், அவருடைய பிள்ளைகள் ஏ.வி.எம். சரவணன், இப்படி ஏ.வி.எம். ஏ.வி.எம். என்று பல பெயர்கள் பத்திரிகைகளிலே வருகிறது. பல பெயர்கள் பட்டியலிடப்படுகின்றன. நான் அதைக் குற்றமாகச் சொல்லவில்லை. ஏ.வி.எம். வீட்டுப் பிள்ளைகள் மூன்று பேர், நான்கு பேர், அவருடைய குடும்பத்தார் கலைத்துறையிலே இருக்கலாம், என்னுடைய வீட்டிலே உள்ளவர்கள் கலைத் துறையிலே ஏன் இருக்கக் கூடாது என்று எனக்கே தெரியவில்லை.

கலைக் குடும்பம் என்று நான் இந்தக் குடும்பத்தையே கலைக் குடும்பமாக நான் ஆக்கியிருக்கும்போது - இதிலே நான் மாத்திரம் என்ன - வைரமுத்து இங்கேயிருக்கிறார், அவர் என்னுடைய குடும்பம் அல்லவா? ராமநாராயணன் இங்கேயிருக்கிறார், அவர் என்னுடைய குடும்பம் அல்லவா? தம்பி பிரசாந்த் இருக்கிறார், அவர் என்னுடைய குடும்பம் அல்லவா? எல்லோரும் என்னுடைய குடும்பம் தான்.

அதனால் தான் கடந்த ஐந்தாண்டு காலத்தில் என்னுடைய தலைமையிலே இயங்குகின்ற இந்த ஆட்சியில் - கடந்த காலத்தில் எந்த ஆட்சியிலும் நடைபெறாத அளவிற்கு அவ்வளவு உதவிகள், அவ்வளவு சலுகைகள் திரைப்பட உலகத்திற்காகச் செய்யப்பட்டுள்ளன என்பதை நீங்கள் அறிவீர்கள்.

இதற்கு முன்பெல்லாம் வெளிப்புறக் காட்சி ஒன்றை படமாக்க வேண்டு மென்று - ஒரு படத்தயாரிப்பாளர் நினைத்தால், ஏதோ ஒரு மண்டபம், ஏதோ ஒரு அரண்மனை முகப்பு தேவை என்று எண்ணினால் - ராஜாஜி மண்டபத்திலே உள்ள படிக்கட்டுகளையும், முகப்பையும் படம் எடுக்கவேண்டுமென்றால், ஒரு நாள் வாடகையாக ஒரு லட்சம் ரூபாய் தர வேண்டுமென்று இருந்தது. அதைக் குறைத்து ஐந்தாயிரம் ரூபாயாக ஆக்கியவன் கருணாநிதி. ஆனால் கலைத் துறைக்கு இன்றைக்கு நான் விரோதியாக ஒரு சிலரால் கருதப்படுகிறேன் என்பது தான் வேடிக்கை, ஆச்சர்யம்.

தமிழ்நாட்டிலே தான் இன்றைக்கு கேளிக்கை வரி இல்லாமல் படங்களை வெளியிடலாம் என்ற அற்புதத்தைச் செய்திருக்கிறோம். ஆனால் இதற்கு எனக்கு தரப்படுகின்ற பரிசு என்ன தெரியுமா? நான் படம் எடுத்து - படத்தயாரிப்பாளர் களிடையே பெரிய அளவுக்கு நான்தான் மற்ற தயாரிப்பாளர்களை எல்லாம் கெடுக்கிறேன் - அவர்களுக்கெல்லாம் போட்டியாக என்னுடைய குடும்பம் தான் இருக்கிறது என்கிறார்கள். நானும் பார்க்கிறேன்.

எதற்கெடுத்தாலும் என்னுடைய குடும்பம், என்னுடைய குடும்பம் என்று இது தான் அவர்கள் கண்ணிலே படுகிறது. என்ன செய்வது? எனக்கு குடும்பம் இருக்கிறதே? குடும்பத்தை நானே ஒழித்து விட முடியுமா? குடும்பம் இருப்பதால் அதிலே உள்ள பிள்ளைகள் - உறவினர்கள் இந்தத் துறைக்கு வருகிறார்கள். இந்தத் துறைக்கு வருகிறவர்கள் எல்லாம் ஏதோ ஏகாதிபத்தியத்தை - ஏகபோகத்தை இந்தத் துறையிலே அனுபவிக்க வேண்டும் என்று என்னால் அனுப்பப்படுகிறவர்கள் என்று சொன்னால், அது நியாயமா? சரி தானா? என்பதை இந்தத் துறையிலே பணியாற்றுகின்ற நீங்கள் தான் எண்ணிப் பார்க்க வேண்டும்.

ஆனால், சில பேருக்கு - யாரும் போராடுவதற்கு எதிரே வராவிட்டால், நிழலோடுவாவது போராடுவார்கள். நிழலோடு போராடிப் போராடிப் பழக்கம். அவர்கள் இப்படி நிழலோடு போராடி, என்னை - முதலமைச்சராக இருக்கிற என்னை விமர்சித்தால் தான், அவர்கள் நடத்துகின்ற எதிர்ப்புக் கிளர்ச்சிக்கு - அவர்கள் எண்ணி இருக்கின்ற புதிய கட்சிக்கு ஆதரவாக இருக்கும் என்று கருதி, இன்று தங்களுடைய நேரத்தைச் செலவிடுவது நல்லதல்ல; அவர்கள் என்னதான் என்னை அழிப்பதற்கு, எனக்குத் தோல்வியை தருவதற்குப் பாடுபட்டாலும்கூட, நான் திட்டவட்டமாகச் சொல்கிறேன் - அவர்களுடைய மேன்மைக்காக, அவர்களுடைய நன்மைக்காக, அவர்களுடைய வளர்ச்சிக்காகத்தான் நான் என்றைக்கும் பாடுபடுவேன் என்ற அந்த உறுதியை மாத்திரம் நான் இந்த நேரத்தில் சொல்லிக் கொள்கிறேன்.

இந்த படத்திலே வரப்போகின்ற வெற்றிகளுக்கு என்னுடைய உரையாடல் மாத்திரம் காரணமாக இருக்க முடியாது; நான் எழுதிய திரைக்கதை மாத்திரம் காரணமாக இருக்க முடியாது. இதிலே இசையமைத்த என்னுடைய அருமைத்தம்பி இளையராஜாவை நான் பாராட்டாமல் இருக்க முடியாது.

எந்தக் கதையை அவரிடத்திலே கொடுத்து, இசையமைக்க வேண்டுமேன்று கேட்டாலும், முதலில் கதையின் தரம் என்ன - கதையின் போக்கு என்ன - கதையின் கதாபாத்திரங்கள் யார் - கதை நடைபெறுகின்ற காலம் எது - என்பவைகளை எண்ணிப் பார்த்து, அதற்கேற்ப இசையமைக்கக்கூடிய ஆற்றல், தமிழ்நாட்டிலே ஒருவர், இருவருக்குத்தான் உண்டு. அவர்களிலே ஒருவர் நம்முடைய இசைஞானி இளையராஜா என்றால், அது மிகையாகாது. அவருக்கு "இசைஞானி'' என்ற பட்டத்தைக் கொடுத்ததும் நான்தான். நல்ல காலம் - பட்டம் பெற்று, இவ்வளவு நாளுக்குப் பிறகும், அவர் விரோதமாகாமல் இருக்கிறார். ஏனென்றால், பல பேர் - வைரமுத்து தவறாக எடுத்துக் கொள்ளக் கூடாது. - பல பேர் என்னிடத்திலே பட்டம் பெற்றவர்கள் எல்லாம், திரும்ப என்னை எதிர்க்கின்ற, பகைத்துக் கொள்கின்றவர்களாகத்தான் இருந்திருக்கின்றார்கள். நான் அதற்காகப் பட்டத்தை திரும்ப வாங்கிடவா முடியும்? கொடுத்தது கொடுத்ததுதான்’’ என்று தெரிவித்தார்.

சாதனைகளை சொல்லியிருக்கிறேன்: நன்றியை எதிர்பார்த்து நிற்கிறேன்: கலைஞர்

நாடு வாழ நாம் புரிந்த சாதனைகளை சொல்லியிருக்கிறேன். அனுபவித்துவரும் தமிழக மக்கள் காட்டப்போகும் நன்றியை எதிர்பார்த்து நிற்கிறேன் என்று முதல் அமைச்சர் கருணாநிதி கூறினார்.

தி.மு.க.தலைவரும் முதல் அமைச்சருமான கருணாநிதி 27.03.2011 அன்று வெளியிட்டுள்ள அறிக்கையில் கூறி இருப்பதாவது:

5 ஆண்டு தி.மு.க.ஆட்சியில்...

ஜெயலலிதா தனது தேர்தல் பிரசாரக் கூட்டங்களில் கடந்த ஐந்தாண்டு கால ஆட்சியில் தமிழக மக்கள் பல்வேறு பிரச்சினைகளைத் தான் சந்தித்து வருகிறார்கள், எந்த நன்மையும் செய்யப்படவில்லை, விலைவாசி உயர்வைக் கட்டுப்படுத்த கருணாநிதி ஏதாவது நடவடிக்கை எடுத்தாரா என்றெல்லாம் கேட்டதாக ஏடுகளிலே செய்தி வந்துள்ளது. எனவே கடந்த ஐந்தாண்டு கால தி.மு.க ஆட்சியில் தமிழக மக்களுக்காக என்னென்ன செய்யப்பட்டது என்பது குறித்தும், விலைவாசி உயர்வைக் கட்டுப்படுத்த அரசு என்ன நடவடிக்கை எடுத்தது என்பது பற்றியும் விளக்கிடுகிறேன்.

ஒரு ரூபாய்க்கு ஒரு கிலோ அரிசி வீதம் மாதம் 20 கிலோஅரிசி ஏழை எளிய மக்களுக்கு வழங்கப்பட்டு அதன் மூலமாக மாதந்தோறும் ஒரு கோடியே 85 லட்சம் குடும்பங்கள் பயனடைகிறார்கள். குறைந்த விலையில் பாமாயில், துவரம் பருப்பு, உளுத்தம் பருப்பு, ரவை, மைதா கோதுமை வழங்கப்படுகிறதே, இது மக்களுக்கு செய்யப்பட்ட நன்மை இல்லையா? விலைவாசியைக் கட்டுப்படுத்துவதற்காக அரசாங்கம் நிறைவேற்றிய திட்டம் இல்லையா? "மானிய விலையில் மளிகைப் பொருள்கள்''என 50 ரூபாய்க்கு 10 சமையல் பொருள்கள் ரேஷன் கடைகள் மூலமாக வழங்கப்படுகின்றன.

கூட்டுறவு கடன் தள்ளுபடி

22 லட்சத்து 40 ஆயிரத்து 739 விவசாயக் குடும்பங்களுக்கு 7 ஆயிரம் கோடி ரூபாய் கூட்டுறவுக் கடன் தள்ளுபடி கடந்த ஐந்தாண்டு காலத்தில் செய்யப் பட்டிருக்கிறதே, ஜெயலலிதாவுக்கு இது மக்களுக்கு செய்யப்பட்ட நன்மையாகத் தெரியவில்லையா? 35 லட்சத்து 54 ஆயிரத்து 721 விவசாயிகளுக்கு 8 ஆயிரத்து 477 கோடியே 56 லட்சம் ரூபாய் பயிர்க்கடன்கள் வழங்கப்பட்டுள்ளன. இவைகள் எல்லாம் கடந்த ஐந்தாண்டு காலத்தில் கழக அரசில் செய்யப்பட்ட நன்மைகளா இல்லையா?

2005 2006ல் நெல் கொள்முதல் குவிண்டாலுக்கு விலை ரூபாய் 600; 2010 2011ல் சாதா ரக நெல் விலை 1050 ரூபாய்; சன்ன ரக நெல் விலை 1100 ரூபாய்; உழவர்களும், வாங்குவோரும் பயனடைய மீண்டும் புதுப்பொலிவுடன் 117 உழவர் சந்தைகள்; மேலும் புதிதாக 45 உழவர் சந்தைகள் அமைப்பு; பயிர்க் காப்பீட்டுத் திட்டத்தில் 2006ல் 50 சதவீத காப்பீட்டுத் தொகையை அரசே மானியமாக வழங்கி, ஊக்கப்படுத்தியதால் 2005 2006ல் ஒரு லட்சம் விவசாயிகள் பயனடைந்த நிலையில்; 2009 2010 ம் ஆண்டில் 9 லட்சத்து ஓராயிரத்து 643 விவசாயிகள் அரசின் மானிய உதவி பெற்றுப் பயிர்க் காப்பீடு செய்தனர். இதுவரை 9 லட்சத்து ஆயிரத்து 643 விவசாயிகளுக்கு 974 கோடி ரூபாய் இழப்பீடுத் தொகை வழங்கப்பட்டுள்ளது; இது மக்களுக்குச் செய்யப்பட்ட சாதனையா இல்லையா? கரும்பு விவசாயிகளுக்கு 2005 2006ல் டன் ஒன்றுக்கு வழங்கப்பட்ட விலை ரூ.1014; தற்போது டன் ஒன்றுக்கு ரூ.2000 வழங்கப்படுகிறது.

மாநிலத்திற்குள் பாயும் ஆறுகளை இணைக்கும் புரட்சிகரமான திட்டத்தின்கீழ் 189 கோடி ரூபாய் மதிப்பீட்டில் காவிரி குண்டாறு இணைப்புத் திட்டம்; 369 கோடி ரூபாய் மதிப்பீட்டில் தாமிரபரணி கருமேனியாறு நம்பியாறு இணைப்புத் திட்டம்; விவசாயிகளுக்கு வழங்கும் சலுகைகளால் உணவு தானிய உற்பத்தி உயர்வு. விவசாயிகளைச் சுயஉதவிக் குழுக்களாக ஒருங்கிணைத்து சுழல்நிதி வழங்கும் திட்டத்தின்கீழ் 27 ஆயிரத்து 294 குழுக்கள் அமைக்கப்பட்டு, 27 கோடியே 29 லட்சத்து 40 ஆயிரம் ரூபாய் சுழல்நிதியாக வழங்கப்பட்டு, 32 ஆயிரத்து 940 குழுக்களுக்கு 402 கோடியே 56 லட்சம் ரூபாய் பயிர்க் கடனாகவும் அளிக்கப்பட்டுள்ளது. ஜெயலலிதாவுக்கு இவைகள் எல்லாம் கடந்த ஐந்தாண்டு காலத்தில் செய்யப்பட்ட சாதனைகளாகத் தோன்றவில்லையா?

இலவச கலர் டி.வி.

ஒரு லட்சத்து 5 ஆயிரத்து 494 கைத்தறி நெசவாளர்களுக்கும், 90 ஆயிரத்து 547 விசைத்தறி நெசவாளர்களுக்கும், சிறப்புத் தொகை செலுத்தி மின் இணைப்பு பெற்ற 2 லட்சத்து 39 ஆயிரத்து 511 விவசாயிகளுக்கும் இலவச மின்சாரம்; மேலும், 2 லட்சம் பம்ப் செட்களுக்கும் இலவச மின்சார இணைப்பு படிப்படியாக வழங்கிட ஆணையிடப்பட்டு வழங்கப்படுகிறது.

3742 கோடியே 42 லட்சத்து 59 ஆயிரம் ரூபாய் செலவில் ஒரு கோடியே 72 லட்சத்து 80 ஆயிரம் குடும்பங்களுக்கு இலவச வண்ணத் தொலைக் காட்சிப் பெட்டிகள் வழங்க முடிவு செய்யப்பட்டு, இதுவரை ஒரு கோடியே 62 லட்சத்து 59 ஆயிரத்து 526 குடும்பங்களுக்கு இலவச வண்ணத் தொலைக்காட்சிப் பெட்டிகள் வழங்கப்பட்டுள்ளன. 661 கோடி ரூபாய் செலவில் 29 லட்சம் குடும்பங்களுக்கு எரிவாயு இணைப்புடன் இலவச எரிவாயு அடுப்புகள் வழங்கப்பட்டு உள்ளன;

ஒரு லட்சத்து 79 ஆயிரம் நிலமற்ற ஏழை விவசாயத் தொழிலாளர்கள் விவசாயிகள் குடும்பங்களுக்கு 2 லட்சத்து 12 ஆயிரத்து 995 ஏக்கர் இலவச நிலம்; 8 லட்சத்து 29 ஆயிரத்து 236 ஏழைக் குடும்பங்களுக்கு இலவச வீட்டு மனைப் பட்டா.

காமராஜர் பிறந்த நாளில்...

காமராஜர் பிறந்த நாளில் "கல்வி வளர்ச்சி நாள்'' என பள்ளிகளில், கல்வி விழா; 2 வயது முதல் 15 வயது வரை உள்ள 73 லட்சம் குழந்தைகள், மாணவ மாணவியருக்கு சத்துணவுடன் வாரம் 5 நாட்களும் முட்டைகள்; முட்டை சாப்பிடாத குழந்தைகளுக்கு வாழைப் பழங்கள்; தமிழ் வழியில் பயிலும் 50 லட்சத்திற்கு மேற்பட்ட மாணவ மாணவியர்க்கு அரசுப் பள்ளிகளிலும், அரசு உதவிபெறும் பள்ளிகளிலும் சிறப்புக் கட்டணங்களும், 11 லட்சம் மாணவ, மாணவியருக்கு 10, 12 ம் வகுப்புகளின் அரசுத் தேர்வுக் கட்டணங்களும் ரத்து.

பட்டப்படிப்பு பயிலும் 3 லட்சத்து 75 ஆயிரத்திற்கும் மேற்பட்ட கலை அறிவியல் கல்லூரி மாணவ மாணவியரின் படிப்புக் கட்டணங்கள் ரத்து; 2010 2011 முதல் எம்.ஏ., எம்.எஸ்ஸி. வகுப்புகளுக்கும் படிப்புக் கட்டணங்கள் ரத்து. படிப்பைத் தொடர இயலாமல் இடையில் நிறுத்திய ஏழை மாணவர்களில் ஆண்டுக்கு 10 ஆயிரம் பேர் வேலை வாய்ப்புகளுக்கேற்ற தொழிற் பயிற்சிகளைச் சமுதாயக் கல்லூரிகள் மூலம் பெற, ஒரு கோடி ரூபாய் செலவில் திறந்த நிலைப் பல்கலைக் கழகம் மூலம் தலா ஆயிரம் ரூபாய் உதவித் தொகை; ஆண்டுதோறும் 24 லட்சத்து 82 ஆயிரம் பள்ளி மாணவர்களுக்கும், 4 லட்சத்து 35 ஆயிரம் கல்லூரி மாணவர்களுக்கும் இலவச பஸ் பாஸ்; ஏழை மகளிர்க்கு பட்டப்படிப்பு வரை வழங்கப்பட்ட இலவசக் கல்வி, முதுகலைப் பட்டப் படிப்பு வரை நீட்டிப்பு.

நுழைவுத்தேர்வு ரத்து

தொழிற்கல்வி படிப்புகளுக்கான நுழைவுத் தேர்வு ரத்து. பட்டதாரிகள் இல்லாக் குடும்பங்களிலிருந்து தொழிற் கல்லூரிகளில் சேரும் முதல் மாணவர் அல்லது முதல் மாணவிக்கு கல்விக் கட்டணம் 20 ஆயிரம் ரூபாய் ரத்து; "மாவட்டத்திற்கொரு மருத்துவக் கல்லூரி'' கோட்பாட்டின்படி விழுப்புரம், திருவாரூர், தருமபுரி, சிவகங்கை, பெரம்பலூர், திருவண்ணாமலை ஆகிய இடங்களில் 6 புதிய மருத்துவக் கல்லூரிகள்; அரசு பொறியியல் கல்லூரிகள் இல்லா திண்டிவனம், விழுப்புரம், பண்ருட்டி, அரியலூர், திருக்குவளை, ராமநாதபுரம், திருவண்ணாமலை, தஞ்சாவூர், திண்டுக்கல், தூத்துக்குடி, கன்னியாகுமரி, காஞ்சிபுரம் ஆகிய 12 மாவட்டங்களில் புதிதாக அரசு பொறியியல் கல்லூரிகள். நூறாண்டு கனவை நனவாக்கிச் "செம்மொழித் தமிழாய்வு மத்திய நிறுவனம்'' சென்னையில் அமைப்பு.

நலிந்த கலைஞர்களுக்கான நிதியுதவித் திட்டத்தின்கீழ் வழங்கப்பட்ட நிதியுதவி மாதம் 500 ரூபாய் என்பது 1000 ரூபாயாக உயர்த்தி வழங்கப்படுகிறது. 2006க்குப்பின் புதிதாக 2500 நலிந்த கலைஞர்களுக்குத் தலா ஆயிரம் ரூபாய் வீதம் உதவித் தொகை வழங்க அனுமதிக்கப்பட்டு இதுவரை 9 ஆயிரத்து 563 கலைஞர்கள் இத்திட்டத்தின்கீழ் பயன் பெற்றுள்ளனர்.

4724 திருக்கோவில்களில் 523 கோடி ரூபாய் செவில் திருப்பணிகள் செய்து குடமுழுக்கு விழாக்கள் நடத்தப்பட்டுள்ளன;

கர்ப்பிணிப் பெண்களுக்கு நிதி உதவி

மூவலூர் ராமாமிர்தம் அம்மையார் திருமண நிதியுதவித் திட்டம் உட்பட அனைத்துத் திருமண உதவித் திட்டங்களின் நிதியுதவி 10 ஆயிரம் ரூபாய் என்பது 25 ஆயிரம் ரூபாயாக உயர்த்தப்பட்டு; 4 லட்சத்து 67 ஆயிரத்து 419 ஏழைப் பெண்களுக்கு 882 கோடியே 6 லட்சம் ரூபாய் நிதியுதவி; ஏழைக் கர்ப்பிணிப் பெண்களுக்குத் தலா 6 ஆயிரம் ரூபாய் நிதியுதவி திட்டத்தின்கீழ் 25 லட்சத்து 76 ஆயிரத்து 612 ஏழை மகளிர்க்கு மொத்தம் 1389 கோடியே 42 லட்சம் ரூபாய் நிதியுதவி; 50 வயது கடந்து திருமணமாகாமல் வறுமையில் வாடும் 12 ஆயிரத்து 904 ஏழைப் பெண்களுக்கு மாதம் 500 ரூபாய் உதவித் தொகை; "வருமுன் காப்போம் திட்டம்'' மீண்டும் செயல் படுத்தப்பட்டு 18 ஆயிரத்து 742 மருத்துவ முகாம்களில் ஒரு கோடியே 77 லட்சத்து 5 ஆயிரத்து 85 பேர் ஏழை எளியோர் பயன்;

தமிழகத்தில் உள்ள 1,421 ஆரம்ப சுகாதார நிலையங்களிலும்; புதிதாக உருவாக்கப்பட்ட 116 ஆரம்ப சுகாதார நிலையங்களிலும் தலா மூன்று செவிலியர்களைப் பணியமர்த்தி 24 மணிநேரமும் மருத்துவ சேவை அளிப்பதால், அங்கு 2005 2006ல் நடைபெற்ற மகப்பேறுகளின் எண்ணிக்கை 82 ஆயிரத்து 532 என்பது, 2009 2010ல் 2 லட்சத்து 98 ஆயிரத்து 853 ஆக, மூன்று மடங்கு உயர்ந்து கிராமப்புற மகளிர் மகிழ்ச்சியாக இருக்கிறார்களே, அது ஐந்தாண்டு கால சாதனையாக அம்மையாருக்குத் தெரியவில்லையா?

கிராமப்புற ஏழைகளுக்கு மருத்துவ வசதி

குழந்தைகள் உயிர் காத்திட மூடிய அறுவை சிகிச்சைக்கு 20 ஆயிரம் ரூபாய்; சாதாரண திறந்த அறுவை சிகிச்சைக்கு 50 ஆயிரம் ரூபாய்; கடினமான திறந்த அறுவை சிகிச்சைக்கு ஒரு லட்சம் ரூபாய் என அரசு நிதி உதவி வழங்கப்படுகிறது. 21.11.2007ல் தொடங்கப்பட்ட இளம் சிறார் இருதய அறுவை சிகிச்சைத் திட்டம், 3.6.2008ல் தொடங்கப் பட்ட பள்ளிச் சிறார் இருதய அறுவை சிகிச்சைத் திட்டம் ஆகிய இரண்டு திட்டங்களின்கீழ் 3264 சிறார்க்கு 17 கோடியே 10 லட்சம் ரூபாய் செலவில் புகழ்வாய்ந்த 28 தனியார் மருத்துவ மனைகளின் மூலம் இருதய அறுவை சிகிச்சைகள் செய்யப்பட்டு, குழந்தைச் செல்வங்களின் அரிய உயிர்கள் பாதுகாக்கப் பட்டுள்ளன.

கிராமப்புற ஏழைகளுக்கும் உடனடி மருத்துவ வசதி கிடைக்கச் செய்திட 445 ஊர்திகளுடன் கூடிய அதிநவீன "அவசர கால மருத்துவ ஊர்தி 108 சேவைத் திட்டம்''தமிழகம் முழுவதும் நடை முறை; 8 லட்சத்து 8 ஆயிரத்து 907 பேர் பயன்; அரசு ஊழியர்களுக்கு புதிய "மருத்துவக் காப்பீட்டுத் திட்டம்''; "உயிர்காக்கும் உயர்சிகிச்சைக்கான கலைஞர் காப்பீட்டுத் திட்டம்''; இதுவரை 2 லட்சத்து 55 ஆயிரத்து 744 ஏழை மக்களுக்கு 667 கோடி ரூபாய் செலவில் உயிர்காக்கும் அறுவை சிகிச்சை செய்யப்பட்டுள்ளன.

வேலை வாய்ப்பு

ஏறத்தாழ 2 லட்சத்து 35 ஆயிரத்து 464 பேருக்கு வேலைவாய்ப்பு வழங்கும் 62 ஆயிரத்து 349 கோடி ரூபாய் முதலீட்டிலான 27 புரிந்துணர்வு ஒப்பந்தங்கள்; 24 அரசாணைகள் மூலம் 51 புதிய தொழிற்சாலைகள் அமைக்க மேற்கொள்ளப்பட்டுள்ள நடவடிக்கைகளில் இதுவரை 12 தொழிற் சாலைகள் புதிதாக திறக்கப்பட்டுள்ளன. 4 லட்சத்து ஓராயிரத்து 704 படித்து வேலை வாய்ப்பற்ற இளைஞர்களுக்கு 284 கோடி ரூபாய் உதவித் தொகை வழங்கப்பட்டுள்ளது; ஏறத்தாழ 5 லட்சத்து 5 ஆயிரத்து 314 இளைஞர்களுக்கு அரசு அலுவலகங்களில் புதிய வேலைவாய்ப்புகள் வழங்கப்பட்டுள்ளன;

ஆதரவற்ற முதியோர், விதவைகள், மாற்றுத் திறனாளிகளுக்கு வழங்கப்படும் உதவித் தொகை மாதம் 200 ரூபாய் என்பது 1.9.2006ல் 400 ரூபாய் எனவும், 24.11.2010 முதல் 500 ரூபாய் என மேலும் உயர்த்தப்பட்டு, மொத்தம் 23 லட்சத்து 71 ஆயிரத்து 370 பேர் மாதம் 500 ரூபாய் வீதம் உதவித்தொகை பெறுகின்றனர். இந்த உதவித் தொகை மாதம் 750 ரூபாயாக உயர்த்தப்படும் என தற்போது தேர்தல் அறிக்கையில் அறிவிக்கப்பட்டுள்ளது. கடுமையாக பாதிக்கப்பட்ட மாற்றுத் திறனாளிகளுக்குப் பராமரிப்பு உதவித் தொகை மாதம் 200 ரூபாய் என்பது 500 ரூபாய் என உயர்த்தப்பட்டு, 2006 முதல் ஆண்டுதோறும் 10 ஆயிரம் கடும் மாற்றுத் திறனாளிகள் பயன்;

சுயஉதவிக்குழுக்களுக்கு சுழல் நிதி

1989ல் தர்மபுரி மாவட்டத்தில் கழக அரசு தொடங்கிய மகளிர் திட்டத்தின் மூலம் இதுவரை உருவாக்கப்பட்டுள்ள மகளிர் சுய உதவிக் குழுக்களின் எண்ணிக்கை 5,54,538. இக்குழுக்களுக்கு வழங்கப்பட்டுள்ள மொத்த கடன் 9 ஆயிரத்து 32 கோடி ரூபாய். 2006க்குப்பின் 26 லட்சத்து 94 ஆயிரம் மகளிர் உறுப்பினரைக் கொண்ட ஒரு லட்சத்து 75 ஆயிரத்து 493 புதிய மகளிர் சுயஉதவிக் குழுக்கள் உருவாக்கப்பட்டு; 1068 கோடி ரூபாய் அளவுக்கு பொருளாதாரக் கடன்கள் வழங்கப்பட்டுள்ளது. 2,81,883 மகளிர் குழுக்களுக்கு வழங்கப்பட்டுள்ள சுழல் நிதி 281 கோடியே 88 லட்சம் ரூபாய்.

மகளிர் சுய உதவிக் குழுக்களைப் போலவே 2006க்குப்பின் 19 ஆயிரத்து 885 இளைஞர் சுயஉதவிக் குழுக்களும், 30 ஆயிரம் நகர்ப்புற சுயஉதவிக் குழுக்களும், 11 ஆயிரத்து 155 விவசாயிகள் கூட்டுப் பொறுப்புக் குழுக்களும் ஏற்படுத்தப்பட்டு நிதியுதவிகள் வழங்கப் படுகின்றன.

நிதிநிலையில் நலிந்த 30 நகராட்சிகளிலும் தலா 75 லட்சம் ரூபாய் செலவில் அடிப்படைக் கட்டமைப்பு மேம்பாட்டுப் பணிகள் மேற்கொள்ளப்படுகின்றன; மாநகராட்சி, நகராட்சிகளின் நிதிநிலை மேம்பட்டு மக்களுக்கு வசதிகள் செய்திட அவை அரசுக்கு செலுத்த வேண்டிய 793 கோடி ரூபாய் கடன் தள்ளுபடி;

சாலை மேம்பாடு

12 ஆயிரத்து 94 கோடி ரூபாய்ச் செலவில் 57 ஆயிரத்து 787 கிலோ மீட்டர் நீளச் சாலைகளில் மேம்பாட்டுப் பணிகளும் பராமரிப்புப் பணிகளும் நிறைவேற்றப் பட்டன; 4 ஆயிரத்து 730கிலோ மீட்டர் நீளமுள்ள சாலைகள் இருவழித் தடங்களாக அகலப் படுத்தப்பட்டுள்ளன; தமிழகத்தில் உள்ள சாலைகளில் 1046 பாலங்கள் மற்றும் 3800 மிகச் சிறுபாலங்கள் 881 கோடி ரூபாய்ச் செலவில் கட்டப் பட்டுள்ளன; தமிழகத்தில் உள்ள 4,676 கி.மீ. தேசிய நெடுஞ்சாலைகளில் 3,226 கி.மீ நீளச் சாலைகள் 4 வழிச்சாலையாக மாற்றப்பட்டு உள்ளன;

தலவரி, தலமேல்வரி, தண்ணீர்த் தீர்வை அனைத்தும் ரத்து; நிலவரி, ஏக்கர் ஒன்றுக்குப் புன்செய் நிலங்களுக்கு 15 ரூபாய் என்பது 2 ரூபாய் என்றும், நன்செய் நிலங்களுக்கு 50 ரூபாய் என்பது 5 ரூபாய் என்றும் பெயர் அளவிற்கு மட்டுமே வசூலிக்க அரசு ஆணை;

ஈரோடு, திருப்பூர், வேலூர், தூத்துக்குடி ஆகிய 4 நகராட்சிகள் மாநகராட்சிகளாக நிலை உயர்த்தப்பட்டுள்ளன. அரியலூர், திருப்பூர் புதிய மாவட்டங்கள் உதயம்;

இஸ்லாமியர் சமுதாயம் மேன்மை பெற 3.5 விழுக்காடு தனி உள் ஒதுக்கீடு; அருந்ததியர் சமூகத்தின் அவலம் தீர 3 விழுக்காடு தனி உள் ஒதுக்கீடு; சமத்துவ சமுதாயம் காணும்நோக்கில் அனைத்துச் சாதியாரும் அர்ச்சகராகும் சட்டம் நிறைவேற்றப்பட்டு பல்வேறு சாதிகளையும் சார்ந்த 216 பேருக்கு அர்ச்சகர் பயிற்சிகள் அளிக்கப்பட்டுள்ளன. அனைத்து சாதியினரும் ஒரே இடத்தில் வசிக்க ஏற்கனவே உருவாக்கப் பட்டுள்ள 145 பெரியார் நினைவு சமத்துவபுரங்களுடன் மேலும் 95 சமத்துவ புரங்கள் அமைத்து 240 சமத்துவபுரங்களையும் தந்தை பெரியார் திருவுருவச் சிலைகளுடன் நிர்மாணிக்கும் திட்டம் நடைமுறை; 95 சமத்துவ புரங்களில் இதுவரை 65 சமத்துவபுரங்கள் திறப்பு; 30 சமத்துவபுரங்கள் அமைக்கும் பணிகள் முடிவடையும் நிலையில் உள்ளன.

புதிய சட்டமன்ற வளாகம்

சென்னை கோட்டூர்புரத்தில் உலகத் தரத்திலான 181 கோடி ரூபாய் மதிப்பீட்டிலான "அண்ணா நூற்றாண்டு நினைவு நூலகம்'' திறப்பு; ஓமந்தூரார் அரசினர் தோட்டத்தில் புதிய சட்டமன்ற தலைமைச்செயலக வளாகம் திறந்து சாதனை; 100 கோடி ரூபாய் செலவில் அடையாறு தொல்காப்பியர் பூங்கா திட்டம்; சென்னை அண்ணா மேம்பாலம் அருகில் 20 ஏக்கர் நிலப்பரப்பில் 8 கோடி ரூபாய் செலவில் உலகத்தரத்திலான "செம்மொழிப் பூங்கா''திறப்பு;

குடிநீர் திட்டம்

சென்னை குடிநீர் பற்றாக்குறையை தீர்த்திட, வட சென்னை மீஞ்சூரில் "கடல்நீரைக் குடிநீராக்கும் திட்டம்'' நிறைவேற்றப்பட்டு திறப்பு; மத்திய அரசு அனுமதித்துள்ள 908 கோடி ரூபாய் நிதியுதவியுடன் தென் சென்னையில் நெம்மேலியில் "கடல்நீரைக் குடிநீராக்கும் திட்டம்;'' ஜப்பான் பன்னாட்டு கூட்டுறவு வங்கி நிதி உதவியுடன் 14 ஆயிரத்து 600 கோடி ரூபாய் மதிப்பீட்டில் "மெட்ரோ ரெயில் திட்ட'' அமைப்புப் பணிகள் நடைபெறுகின்றன; 1929 கோடி ரூபாய் மதிப்பீட்டில், "ஒகேனக்கல் கூட்டுக் குடிநீர்த் திட்டம்;''630 கோடி ரூபாய்ச் செலவில், "ராமநாதபுரம் கூட்டுக் குடிநீர்த் திட்டம் நிறைவேற்றம்;''

சென்னைத் துறைமுகத்திலிருந்து மதுரவாயல் வரை 1,655 கோடி ரூபாய் மதிப்பீட்டில், "பறக்கும் சாலைத் திட்டம்;'' வேகமாக உருவாகி வருகிறது. மத சுதந்திரம் பேண "கட்டாய மதமாற்றத் தடைச் சட்டம் ரத்து;'' "மூன்றாவது காவல் ஆணையம்'' மூத்த ஐ.ஏ.எஸ். அதிகாரி ஆர்.பூர்ணலிங்கம் தலைமையில் அமைக்கப்பட்டு, அது வழங்கிய 444 பரிந்துரைகளில் இதுவரை 278 பரிந்துரைகள் நடைமுறை; 2 லட்சத்து 12 ஆயிரத்து 981 சத்துணவுப் பணியாளர்கள் பயன்பெற காலமுறை ஊதியம்; ஓய்வூதியம்;

அரசு ஊழியர்களுக்கு...

டெஸ்மா, எஸ்மா சட்டங்களை நீக்கி அரசு ஊழியர்கள் ஆசிரியர்களுக்கு பறிக்கப்பட்ட சலுகைகளைகள் மீண்டும் வழங்கப்பட்டு, 1.1.2006 முதல் தமிழகத்தில் ஆண்டுக்கு 5 ஆயிரத்து 155 கோடியே 79 லட்சம் ரூபாய் கூடுதல் செலவில் 6வது ஊதியக்குழு பரிந்துரைகள் நடைமுறைப்படுத்தப்பட்டன. இதன்காரணமாக, 11 ஆயிரத்து 93 கோடி ரூபாய் அரசு ஊழியர் ஆசிரியர்களுக்கு நிலுவைத் தொகையாக அனுமதிக்கப்பட்டு புதிய வரலாறு படைக்கப்பட்டுள்ளது.

ஏறத்தாழ 2 லட்சம் அரசு ஊழியர்கள் ஆசிரியர்கள் பயன்பெறும்வகையில் 200 கோடி ரூபாய் கூடுதல் செலவில் ஒரு நபர் குழு பரிந்துரை நடைமுறை; ஆசிரியர்களின் ஊதிய முரண்பாடுகளை நீக்கி 163 கோடி ரூபாய்ச் செலவில் கூடுதல் சலுகைகள்; 2.73 லட்சம் ஆசிரியர்கள் பயன். அரசு மற்றும் உள்ளாட்சி அமைப்புகளில் பணிபுரியும் அலுவலர்கள், ஆசிரியர்கள் மற்றும் ஆசிரியரல்லாத அலுவலர்கள், அரசு நிதியுதவி பெறும் கல்வி நிறுவனங்களில் பணிபுரியும் அலுவலர்களில், மாற்றுத் திறனாளிகளுக்கு மாதந்தோறும் வழங்கப்படும் ஊர்திப்படி 300 ரூபாயிலிருந்து 1000 ரூபாயாக உயர்த்தி வழங்கிட ஆணை;

குடிசை வீடுகளுக்கு பதில் கான்கிரீட் வீடு

21 லட்சம் குடிசை வீடுகளை 6 ஆண்டுகளில் கான்கிரீட் வீடுகளாக மாற்றும் "கலைஞர் வீடு வழங்கும் திட்டம்'' என்னும் புரட்சிகரமான திட்டம். நடப்பாண்டில் ஒரு வீட்டிற்கு 75 ஆயிரம் ரூபாய் மானியம் வீதம் 2,250 கோடி ரூபாய்ச் செலவில் 3 லட்சம் வீடுகளைக் கட்டுவதற்குத் திட்டமிடப்பட்டு, பயனாளிகளுக்கு வீடு கட்டுவதற்குரிய பணி ஆணைகள் வழங்கப்பட்டன. இத்திட்டத்தின்கீழ் முதல் வீடு கடலூர் மாவட்டம் சிதம்பரம் அருகே வல்லம்படுகை கிராமத்தில் 9.10.2010 அன்று பயனாளிக்கு வழங்கப்பட்டது. இதுவரை 75 ஆயிரம் கான்கிரீட் வீடுகள் கட்டி முடிக்கப்பட்டுள்ளன. 31.3.2011க்குள் ஒரு லட்சத்து 50 ஆயிரம் கான்கிரீட் வீடுகளும், 15.4.2011க்குள் 2 லட்சம் கான்கிரீட் வீடுகளும் கட்டி முடிக்கப்படும். இதுவரை இத்திட்டத்திற்கு 1082 கோடி ரூபாய் அரசு செலவிட்டுள்ளது.

மேலும் 12 லட்சம் பயனாளிகளுக்கு தகுதி அட்டைகள் வழங்கப்பட்டுள்ளன. இரண்டாம் கட்டமாக மேலும் 3 லட்சம் குடிசைகள் இத்திட்டத்தின்கீழ் கான்கிரீட் வீடுகளாகக் கட்டுவதற்கு அனுமதிக்கப்பட்டு 2011 பிப்ரவரியில் பணி ஆணைகள் வழங்கப்பட்டுள்ளன. இத்திட்டத்திற்கான அரசு மானியம் 75 ஆயிரம் ரூபாய் என்பது ஒரு லட்சம் ரூபாயாக உயர்த்தப்படும் என தேர்தல் அறிக்கையில் வாக்குறுதி அளிக்கப் பட்டுள்ளது.

சாதனைகளை சொல்லியிருக்கிறேன்

இன்னும் துறைவாயிலாக கழக அரசின் ஐந்தாண்டு காலச் சாதனைகளையும் பட்டியலிடுவதென்றால் இடம் போதாது என்பதால் அந்தப் பட்டியலை நிறுத்தி விட்டேன். தற்போது கடந்த ஐந்தாண்டுகளில் எந்தச் சாதனையும் செய்யப்படவில்லை என்று தேர்தல் பிரசாரக் கூட்டங்களில் பேசப்படுவதால் ஒட்டுமொத்த சாதனைகள் சிலவற்றை அவர்களுக்கும், நாட்டு மக்களுக்கும் ஞாபகப்படுத்துவதற்காக இதனைத் தொகுத்து வெளியிட்டுள்ளேன்.

செய்த சாதனைகளைச் சொல்லியிருக்கிறேன். இந்தச் சாதனைகளை அன்றாடம் அனுபவித்து வரும் தமிழ்நாட்டு மக்கள் காட்டப்போகும் நன்றியினை எதிர்பார்த்து நிற்கின்றேன்.

இவ்வாறு முதல் அமைச்சர் கருணாநிதி கூறி உள்ளார்.

திமுகவினருக்கு கலைஞர் வேண்டுகோள்

அதிகாரபூர்வ வேட்பாளர்களுக்கு எதிராக மனு தாக்கல் செய்த தி.மு.க.வினர் போட்டியில் இருந்து விலகும்படி, முதல் அமைச்சர் கருணாநிதி உருக்கமான வேண்டுகோள் விடுத்து இருக்கிறார்.

இதுகுறித்து முதல் அமைச்சர் கருணாநிதி 27.03.2011 அன்று வெளியிட்டுள்ள அறிக்கையில் கூறி இருப்பதாவது:

தலைவர் தந்தை பெரியார், திராவிட முன்னேற்றக்கழக அரசுக்கு வழங்கிய வாழ்த்துச் செய்தியில் மிக முக்கியமான ஒன்றைக் கோடிட்டுக்காட்டிச் சொன்னார். "கடமை, கண்ணியம், கட்டுப்பாடு என்பது தி.மு.க.வின் முழக்கமாக இருக்கிறது.

என்னைப் பொறுத்தவரையில் கடமையிலும், கண்ணியத்திலும் கழகம் கடைப்பிடிக்க வேண்டிய உறுதியை விட; கட்டுப்பாட்டில்தான் அதிக உறுதியைக் கடைப்பிடிக்க வேண்டும்; கடமை தவறினாலும், கண்ணியம் தவறினாலும், கழகத்துக்கு சிறிதளவு சேதாரம்தான் ஏற்படும்; கட்டுப்பாடு தவறினால் கழகம் முழுமையாக சேதமுற்றுவிடும்.

எனவே, எப்பாடுபட்டாவது கட்டுப்பாட்டைக் காப்பாற்றுங்கள்'' என்று உறுதிபடச் சொல்வார்.

கண் கலங்குகிறேன்

இந்த தேர்தலில் ஓரிரு இடங்களில் போட்டியிட வாய்ப்பு கிடைக்காதவர்கள், கழகத்தின் மீது சேற்றை வாரி இறைப்பதைப் போல் இத்தனை ஆண்டு காலமாக தன்னை வளர்த்து சமுதாயத்துக்கு அடையாளம் காட்டிய கழகத்தின் கழுத்தையே அறுப்பதைப்போல்; பதவிப் பொறுப்பு கிட்டவில்லை என்றதும் கழகக் கட்டுப்பாட்டை துச்சமெனக் கருதி சுயேச்சைகளாகவோ அல்லது விலகி நின்றோ தேர்தலில் போட்டியிடும் கழகத்தினர் சிலரின் போக்கு கண்டு கண்கலங்குகின்றேன்.

விலகிக்கொள்ள வேண்டும்

இவர்களா இப்படி?'' என்று மனம் நொந்து போகின்றேன். என்பால் இதுவரை காட்டிய அன்பும், கழகத்தின் மீது கொண்டிருந்த பற்றும் பாசமும் போலியானவையல்ல, உண்மையானதுதான் என்பதை நிரூபிக்க, அந்த உடன்பிறப்புகளுக்கு ஒரே வழிதான் உண்டு. அவர்கள் உடனடியாக அதிகாரபூர்வமற்ற போட்டியிலிருந்து விலகிக் கொண்டு கழகத்தின் கண்ணியத்தையும், கட்டுப்பாட்டையும் காத்திட வேண்டும் என்று கேட்டுக்கொள்கிறேன்''.

இவ்வாறு முதல் அமைச்சர் கருணாநிதி கூறி உள்ளார்.

தேர்தல் அறிக்கை என்ற பெயரில் ஜெயலலிதா புருடா விட்டுள்ளார் - துணை முதல்வர் மு.க.ஸ்டாலின் பேச்சு

தேர்தல் அறிக்கை என்ற பெயரில் ஜெயலலிதா புருடா விட்டுள்ளார் என்று துணை முதல்வர் மு.க.ஸ்டாலின் பேசினார்.

கொளத்தூர் தொகுதியில் துணை முதல்வர் மு.க.ஸ்டாலின் போட்டியிடுகிறார். 27.03.2011 அன்று அவர் 2வது நாளாக திறந்த ஜீப்பில் வீதி வீதியாக சென்று மக்களை சந்தித்து வாக்கு சேகரித்தார். மாலை 4 மணி முதல் இரவு 10 மணி வரை 50 மற்றும் 54வது வட்டங்களில் வாக்கு சேகரித்தார். வழியெங்கும் ஆண்களும், பெண்களும் உற்சாகமாக பட்டாசு வெடித்து வரவேற்பு அளித்தனர். பெண்கள் ஆரத்தி எடுத்து மலர் தூவி வாழ்த்து தெரிவித்தனர். திறந்த ஜீப்பில் மு.க.ஸ்டாலினுடன் மேயர் மா.சுப்பிரமணியன், வி.எஸ்.பாபு எம்.எல்.ஏ, கு.க.செல்வம் ஆகியோர் சென்றனர்.

வாக்கு சேகரிப்பின் போது மு.க.ஸ்டாலின் பேசியதாவது:

தமிழகத்தில் முதல்வர் கருணாநிதியின் ஆட்சி தொடர்ந்திட நீங்கள் ஆதரவு தர வேண்டும் என்று கேட்பதற்காக உங்களை நாடி வந்திருக்கிறேன். தேர்தல் நேரம் மட்டுமல்ல, எந்த நேரத்திலும், எப்படிப்பட்ட சூழ்நிலையிலும், நாங்கள் உங்களுடன் இருப்பவர்கள். 5 ஆண்டு திமுக ஆட்சியில் 2006ம் ஆண்டு தேர்தலின் போது தரப்பட்ட எல்லாம் உறுதிமொழிகளும் நிறைவேற்றப்பட்டு விட்டன. 100க்கு 100 சதவீதம் திட்டங்களை நிறைவேற்றி விட்டுடோம் என்ற உரிமையோடு வாக்கு கேட்டு வந்திருக்கிறேன். தேர்தல் நேரம் எத்தனையோ பேர் வருவார்கள், போவார்கள். அதை செய்தேன், இதை செய்தேன் என்பார்கள். அதுபோல தான் ஜெயலலிதா இந்த தேர்தலில் சில அறிவிப்புகளை வெளியிட்டு இருக்கிறார். அவை புதிய அறிவிப்புகள் அல்ல.

கருணாநிதி வெளியிட்ட தேர்தல் அறிக்கையை ஜெராக்ஸ் எடுத்து வெளியிட்டு இருக்கிறார். நாங்கள் உங்களிடம் வாக்கு கேட்ட போது இதை, இதை செய்வோம் என்றோம். அதன்படி, ஒரு கிலோ அரிசி ஒரு ரூபாய், பெண்கள் திருமண உதவி ஸீ25,000, சமத்துவபுரம், குடிசைக்கு பதிலாக காங்க்ரீட் வீடுகள், கலைஞர் காப்பீட்டு திட்டம், 108 ஆம்புலன்ஸ் திட்டம் போன்றவை நிறைவேற்றப்பட்டுள்ளன. இந்த சாதனைகளை பட்டியல் போட்டு தந்து இருக்கிறோம். கடந்த 2001 முதல் 2006 வரை ஜெயலலிதா ஆட்சி நடந்தது. அவர் ஆட்சியில் ஏதாவது செய்தோம் என்று கூற முடியவில்லை. அவருக்கு தமிழ்நாட்டை பற்றி கவலை இல்லை. கொடநாடு பற்றி தான் கவலைப்படுவார். ஆனால் கருணாநிதி உங்களோடு இருந்து, தமிழ்நாட்டு மக்களுக்காக பல திட்டங்கள், அறிவிப்புகளை தீட்டி அவற்றை நிறைவேற்றுவார். அந்த அடிப்படையில் தேர்தல் அறிக்கையை தந்துள்ளார். நிச்சியமாக நிறைவேற்றுவார்.

உங்களுக்கு பணியாற்ற நான் காத்திருக்கிறேன். என்னை பயன்படுத்திக் கொள்ளுங்கள். மகளிர் சுய உதவிக்குழு 1989ல் திமுக ஆட்சியில் தொடங்கப்பட்டு, இன்று கம்பீரமாக வளர்ந்திருக்கிறது. மகளிர் சுய உதவிக்குழு இன்றி யாவரும், எந்த காரியமும் செய்ய முடியாது. அதற்கு காரணமாக இருந்த கருணாநிதி ஆட்சி மீண்டும் மலர வேண்டும். மகளிர் சுய உதவிக்குழுக்கான சுழல்நிதி ஸீ2 லட்சத்தில் இருந்து ஸீ4 லட்சமாக உயர்த்தப்பட்டுள்ளது. அதில் ஸீ2 லட்சம் மானியம். இதை பார்த்து விட்டு ஜெயலலிதா நாங்கள் ஸீ10 லட்சம் தருவோம் என்று அபாண்டமான புருடா விட்டுருக்கிறார். இதே ஜெயலலிதா கடந்த முறை ஆட்சியில் இருந்த போது, மகளிருக்கான பயிற்சி தொகையை ஸீ45 இருந்து ஸீ7.50 ஆக குறைத்தார். கருணாநிதி முதல்வர் ஆனதும் மீண்டும் அதை ஸீ45 ஆக்கினார்.

நான் அந்த துறை அமைச்சரானதும், நகர் மற்றும் மாநகர பகுதியில் சுழல் நிதி வழங்கப்பட்டது. உங்கள் நன்மைக்கு பாடுபடும் இந்த ஆட்சி தொடர வேண்டும். உங்களில் ஒருவனாக தொண்டாற்ற என்னை தேர்ந்தெடுங்கள். என் பணிகள் பற்றி நான் பெருமையோடு பேச தேவையில்லை. 2 முறை மேயராக இருந்து சென்னை மக்களுக்கு ஆற்றிய பணிகளை நீங்கள் அறிவீர்கள். உள்ளாட்சித்துறை ஆற்றிய பணிகளுக்காக பல பரிசுகள் கிடைத்துள்ளன. துணை முதல்வராக பொறுப்பேற்று முதல்வருக்கு மட்டுமல்ல, மக்களுக்காக தொண்டாற்ற என்னை ஒப்படைத்து இருக்கிறேன். இந்த தொகுதி வேட்பாளரான எனக்கு மாபெரும் வெற்றியை தாருங்கள்.

இவ்வாறு அவர் பேசினார்.

திமுக அரசு செயல்படுத்திய ஏழை பெண்கள் திருமண நிதி உதவி திட்டத்தை நிறுத்தியவர் ஜெயலலிதா - மு.க.ஸ்டாலின் குற்றச்சாட்டு

“திமுக அரசு செயல்படுத்திய ஏழை பெண்கள் திருமண நிதியுதவி திட்டத்தை நிறுத்தியவர் ஜெயலலிதா” என்று துணை முதல்வர் மு.க.ஸ்டாலின் குற்றம் சாட்டினார்.

மக்கள் பாதுகாப்பு கழகம் சார்பில் உலக தமிழ் செம்மொழி மாநாட்டு சிறப்பு மலர் வெளியீட்டு விழா, வேப்பேரி பெரியார் திடலில் 27.03.2011 அன்று நடந்தது. தஞ்சை தமிழ் பல்கலைக்கழக முன்னாள் துணைவேந்தர் அவ்வை நடராஜன் தலைமை வகித்தார். தலைவர் மணிமாறன் வரவேற்றார். முதல் பிரதியை துணை முதல்வர் மு.க.ஸ்டாலின் வெளியிட, தமிழர் நீதிக்கட்சி தலைவர் சுபா.இளவரசன் பெற்றுக் கொண்டார்.

இந்நிகழ்ச்சியில் மு.க.ஸ்டாலின் பேசியதாவது:

தேர்தல் பிரசாரம் சூடுபிடித்துள்ள நிலையில் இந்த விழா நடக்கிறது. ஆயிரக்கணக்கான பெண்கள் இங்கே திரண்டிருப்பது, எனக்கு ஆச்சரியமாக உள்ளது. பெண்கள் அதிக அளவில் விழிப்புணர்வு பெற்றிருக்கிறார்கள் என்பதற்கு எடுத்துக்காட்டாக தான் இங்கு திரண்டிருக்கும் தாய்மார்களை பார்க்கிறேன்.

1929ம் ஆண்டு செங்கல்பட்டில் நடந்த மாநாட்டில், பெண்களுக்கு சொத்தில் சம உரிமை தர வேண்டும் என்ற தீர்மானத்தை பெரியார் நிறைவேற்றினர். அதை, 60 ஆண்டுகளுக்கு பிறகு 1989ல் முதல்வர் கருணாநிதி நிறைவேற்றி வைத்தார். திமுக ஆட்சியில்தான் அரசு வேலைகளில் பெண்களுக்கு 30 சதவீத இடஒதுக்கீடு, உள்ளாட்சி அமைப்பில் 33 சதவீத இடஒதுக்கீடு வழங்கப்பட்டது.

ஏழை பெண்களுக்கு மூவலூர் ராமாமிர்தம் அம்மையார் நினைவு திருமண உதவி திட்டத்தை 1989ல் கருணாநிதி தொடங்கினார். அப்போது க்ஷீ 5 ஆயிரம் வழங்கப்பட்டது. 1991ல் ஆட்சி பொறுப்புக்கு வந்த ஜெயலலிதா, இந்த திட்டத்தை நிறுத்தினார். 96ல் மீண்டும் ஆட்சிக்கு வந்த கருணாநிதி, திருமண உதவியை

க்ஷீ 5 ஆயிரத்தில் இருந்து க்ஷீ 10 ஆயிரமாக உயர்த்தினார். பின்னர், 2001ல் ஆட்சி மாற்றம் ஏற்பட்டது. அப்போதும் அந்த திட்டத்தை ஜெயலலிதா நிறுத்தினார்.

2006ல் மீண்டும் திமுக ஆட்சி அமைந்ததும் க்ஷீ 10 ஆயிரமாக வழங்கப்பட்ட திருமண உதவி தொகையை க்ஷீ 15 ஆயிரமாக கருணாநிதி உயர்த்தி வழங்கினார். பின்னர், 6 மாதத்தில் அந்த நிதி க்ஷீ 20 ஆயிரமாகவும், அடுத்த 6 மாதத்தில் க்ஷீ 25 ஆயிரமாகவும் உயர்த்தப்பட்டது. இப்போது வெளியிடப்பட்ட திமுக தேர்தல் அறிக்கையில் திருமண உதவித் தொகையை க்ஷீ30 ஆயிரமாக உயர்த்துவதாக கருணாநிதி அறிவித்துள் ளார்.

மகளிர் சுயஉதவிக் குழுவை 1989ல் தர்மபுரியில் கருணாநிதி தொடங்கி வைத்தார். அந்த இயக்கம் இப்போது மிகப்பெரிய வளர்ச்சி அடைந்துள்ளது. நாட்டிலேயே மகளிர் சுயஉதவிக் குழு வளர்ச்சியிலும், எண்ணிக்கையிலும் தமிழகம் முதலிடத்தில் உள்ளது. பெண்களுக்கு பல்வேறு திட்டங்களை கொண்டு வந்து செயல்படுத்தியவர் நமது முதல்வர் கருணாநிதி. இதை எல்லாம் உணர்ந்து தாய்மார்களும், பெண்களும் கடமையாற்ற வேண்டும்.

இவ்வாறு மு.க.ஸ்டாலின் பேசினார்.